Атырауға Жапонияның іскер топ өкілдері келді

АТЫРАУ. 19 ақпан. Атырау облысына Жапонияның іскер тобы құрамында өндірістік, қаржылық және сауда-саттық құрылымдарының өкілдері келді. Бұл туралы egemen.kz тілшісі хабарлады. Жапондық іскер топ өкілдерін бастап келген РОБОТО қауымдастығы директорының орынбасары Мики Вадзиманың мәлім етуінше, оларды экономиканың нақты секторы қызықтырады. Соның ішінде мұнай-химия саласына басымдық берілетіндігі аңғарылды. Жалпы, бұл елдің осы заманғы жаңа технологияларды ойлап табу, құрастыру тәжірибесі бай. Алдағы уақытта жапондық ғалымдар дайындаған энергия үнемдейтін технологиялар Қазақстанда таныстырылатынға ұқсайды. Атырау облысының әкімі Бақтықожа Ізмұхамбетов жапондық іскер топ өкілдеріне жер асты суларын тұщыту, қой және түйе жүндерінен киім тігу және күн энергиясын өндіру жобаларына жапондық технологияларды қолдану жөніндегі ұсынысымен бөлісті. Бірлескен кәсіпорын құру ықтималдығы да талқыланды. Жолдасбек Шөпеғұл. Дерек:egemen.kz. Сурет: «Атырау» газеті.