Швейцарияда пойыздар соғысуынан 49 адам зардап шекті

АСТАНА. 20 ақпан. Швейцарияда пойыздардың соғысуы салдарынан екі составтан бірнеше вагон рельстен шығып кетті. Бұл туралы Швейцария федералды темір жолдар мен жергілікті полиция өкілдерінің деректеріне сілтеме жасаған ВВС (Би-би-си) радиостансасы хабарлады. Апат жергілікті уақыт бойынша таңғы 6:45 сағат шамасында Цюрихтің солтүстік жағынан 30 шақырым жердегі Рафц деген коммуна тұсында орын алған. Рейтер ақпарат агенттігінің дерегінше, кем дегенде 49 адам зардап шеккен. Алдын ала мәлімет бойынша, соқтығысу Рафцтан Шаффхацзенге қарай шыққан қалааралық составы мен Цюрихке бет алған жүрдек пойыз арасында болған. Қазіргі таңда желіде пойыздардың қозғалысы қиындап тұр. Швейцария темір жолының басшылығы осы бағыттарға қосымша жолаушылар автобустарын аттандырып үлгерді. Апат болған жерде құтқарушылар жұмыс жасап жатыр. Билік сондай-ақ барлық аймақтардан медициналық бригадаларды жеткізуде. Мұрат Айтқожа.