«Достық кітабы» – еңбек ұжымдарында

Ассамблея жылының мерейлі салтанаты күн санап шарықтай түсуде. Елбасы, Қазақстан халқы Ассамблеясының Төрағасы Нұрсұлтан Назарбаевтың қатысуымен ашылған «Қоғамдық келісім» сарайы тағы бір игі шараның шымылдығын ашты. Мұнда «Ассамблея – бірлік тұтқасы» мега-жобасы бастау алып, «Достық кітабын» мекемелер мен кәсіпорын ұжымдарына тапсыру шарасы өткізілді. – Мемлекет басшысының бас­тамасымен құрылған Қазақстан халқы Ассамблеясы еліміздегі дос­тық, бауырмалдық пен түсіністік қағидалары біздің мәңгілік құнды­лығымыз екендігін бүкіл әлемге паш етті, – деді салтанатқа қатысушыларды құттықтауында Ақмола облыстық Қазақстан халқы Ассамблеясы төрағасының орынбасары Марзият Тохаева. – «Достық кітабы» эстафетасы 2013 жылдан қолға алынып, бүгінге дейін жалпы білім беретін мектептердегі, одан кейін кол­ледждер мен жоғары оқу орындарындағы игі шараларға екпін берді. Еркін пікір алаңына айналған бұл жоба енді еңбек ұжымдарындағы жақсы істердің жаршысы болатындығына сенеміз. Көкшетау қаласындағы барлық ұлттық-мәдени орталықтардың, оқу орындары мен мекемелердің өкілдері қатысқан жиында Қазақ­стан халқы Ассамблеясының мүшелері Мейрамбек Киіков пен Елена Мащинская облыс әкімі Сергей Кулагинмен бірге Астана қаласында, Ассамблея жылы бастау алған күні «ҚХА – 20 игі іс» эстафетасының символы – «Тайқазанды» қабылдап алған сәттегі әсерлерімен бөлісті. «Тайқазанымыз» жылы көңілдерге, қамқор көмекке тола бергей деген тілек білдірілді. Кездесуге қатысушылардың тілегі бойынша облыстық мұрағат және құжаттама басқармасының басшысы Наталья Глушковская мен дін істері жөніндегі басқар­маның басшысы Сәуле Ыбыраева өз ұжымдары атқарып жатқан жұмыстар жайлы мағлұмат берді. Мәселен, облыстың мұра­ғат жүйесі 21 мемлекеттік мұра­ғатты бірік­тіреді екен. Бұл респуб­ликадағы ең үлкен құрылым. Мұндағы 5233 қорда 309598 іс сақ­таулы. Ұжым өткен жылы жеке тұлғалар мен ұйымдардың 23 мың сұрау салуын дер кезінде қана­ғаттандырған. Ал Сәуле Ыбыраева облыс аумағында 205 діни бірлестік пен 50 миссионерлік қозғалыс жұмыс істейтіндігін, олар өңірдегі түсіністік пен тұрақтылыққа қыз­мет ететінін айтты. Шара барысында «Достық кітабы» облыстық мұрағат және құжаттама басқармасының басшысы Наталья Глушковская мен облыстық статистика департаменті басшысының орынбасары Еркін Көкеноваға салтанатты жағдайда табыс етілді. Бақберген АМАЛБЕК, «Егемен Қазақстан». Ақмола облысы.