Туризм саласындағы ынтымақтастыққа арналды

Жақында Арменияның туристік орталықтарының бірі – Цахкадзор қаласында Қазақстанның Армениядағы елшілігінің бастамасымен және «Еуропалық интеграция» үкіметтік емес ұйымының (ҮЕҰ) қолдауымен «Қазақстан мен Арменияның туристік әлеуеті: тәжірибе, келешек, ынтымақтастық» тақырыбында конференция өтті. Іс-шараға жергілікті сарапшылық топтардың, қазақстандық және армяндық туристік ұйымдардың және бұқаралық ақпарат құралдарының өкілдері қатысты, деп хабарлады СІМ-нің баспасөз қызметі. Қазақстан Республикасының уақытша сенімді өкілі Қанат Хасенов конференцияны аша отырып, Қазақстандағы туризмді дамытудың негізгі бағыттарына тоқталып, Қазақстандағы Қыс­қы Универсиада – 2017 және ЭКСПО-2017 халықаралық ма­ман­дандырылған көрмесі сияқты елде өтетін халықаралық іс-шараларды атап өтті. Қазақ­стандық дипломат, сондай-ақ, конференцияға қатысушыларды мемлекеттің, экономиканың және қоғамның сатылы жаңғыру бағытының негізін қалайтын Президент Нұрсұлтан Назарбаев жариялаған «100 нақты қадам» Ұлт жоспарының мақсаттарымен және міндеттерімен таныстырды. Конференцияда Армения Экономика министрлігінің өкілі Мехак Апресян сөз алып, Қазақстан тарапы ұсынған тақырыптың маңыздылығы мен өзектілігін атап, Арменияның туризмді тамыту саласындағы тәжірибесі туралы баяндады және екі ел арасында осы бағытта ынтымақтастықты нығайтуды ұсынды. Қазақстан экотуризм бойынша ақпараттық ресурстық орталығының үйлестірушісі Айгүл Исағұлова жиынға қатысушыларды Қазақстанның зор туристік мүмкіндіктерімен, сон­дай-ақ, еліміздегі туризмді 2020 жылға дейін дамыту бағдар­ла­масымен жан-жақты таныстырды. Қазақстандық туристік ассоциациясы ішкі және келушілер туризмінің басшысы Раушан Сартаева армяндық аудитория­ны еліміздің туризм индустрия­сы­ның қазіргі ахуалы, шетелде туристік өнімді ілгерілету жө­­нін­дегі бір­лескен жобаларды құру мүмкіндіктерін айтып берді. Ал өз кезегінде Арменияның экономикалық интеграция бойынша сарапшысы Лусине Тумян Арменияның ЭКСПО-2017 ма­­ман­дандырылған көрмесіне қатысу мәселесіне байланыс­ты екі ел арасында атқарылып жатқан іс-шараларға тоқталып, Қазақ­стан та­рапының ұйым­дас­тыру жұ­мыстарын жоғары бағалады. Жиын соңында Елбасы Нұр­сұлтан Назарбаевтың армян тілінде басып шығарылған «Нұр­лы жол – болашаққа бас­тар жол» Жолдауы және Қазақ­станның әлеуметтік-эконо­ми­калық және қоғамдық-саяси дамуы туралы материалдар таратылды. «Егемен-ақпарат».