Ел табысын Елбасымен байланыстырған хаттар

* Президент почтасынан Мемлекет басшысы Нұрсұлтан Назарбаевтың атына Қа­зақ­стан халқы Ассамблеясы Кеңесінің Қазақстан Республикасы Президентінің сайлауын өткізу жөніндегі бастамасына байланысты хаттар мен жеделхаттар көптеп келуде, деп хабарлады Президенттің баспасөз қызметі. Мемлекет басшысының аты­на ғылыми-зерт­теу меке­ме­лерінің жұмысшы­лары­нан, қоғамдық бірлестіктердің мү­шелерінен, мәдениет өкіл­дерінен, сондай-ақ, елдің түрлі өңірлеріндегі азаматтардан бас­тамаға және Қазақстанның тұрақтылық пен орнықты даму бағдарын сақтауға қолдау білдірген хат-хабарлар көптеп келіп жатыр. А.Әшімов, Н.Ықтымбаев, С.Елу­бай, С.Нарымбетов және Р.Әб­дірәшов сынды кинематография өнерінің бірқатар танымал қайраткерлері Нұрсұлтан На­зарбаевтың Отанымыздың игі­лігі жолындағы қажырлы ең­бегіне рахмет айтып, прези­денттік сайлау­ды өткізуді зор ықы­ласпен және шынайы қол­дай­тындықтарын атап өткен. «Бүгінде Қазақстанның кине­ма­тографиясы бұрын-соңды болма­ған өрлеуге бет алғанын, қазақ кино­сының абыройы көз алдымызда ас­қақтап келе жатқанын бәрі көріп отыр. Бұл біздің еліміздің тұрақ­ты­лығының айқын көрсеткіші,  өйт­кені, «зеңбіректер гүрсілдеп жат­қан­да, муза тұншығады». Су­рет­ші «тұрмыс тауқыметінің қою тү­тінін­де» шығарма тудырып, ойла­ға­нын жүзеге асыра алмайды. Сіз бізге шы­ғармашылық туындылар жасау­ға мүмкіндік беріп отырсыз. Бола­­шағымызды Сізбен бірге болу арқы­лы ғана көреміз», – делінген хатта. Экономика институтының, «Ғы­лым ордасы» РМК, Білім және ғы­лым министрлігі Ғылым коми­теті­нің философия, саясаттану және дінтану институтының басшылары  инновациялық индустрияландыруды, инфрақұрылымдық дамуды елдің басты басымдықтарының бірі ретінде жариялау ғалымдар үшін маңызды оқиға болғанына назар аударған. «Отандық ғылымды жүйелі қол­дауға бағытталған Сіздің саясатыңыз елеулі нәтиже берді. Ғылыми қызметкерлердің саны өсіп келеді. Біз Сіз ұсынған бағдарламалар мен стратегияны толығымен қолдаймыз және ғылыми-техникалық прогресс туын әрі қарай да абыроймен алып жүретінімізге сендіреміз. Кез келген міндеттер мен биік мақсаттарға біз Елбасымен бірге жете аламыз», – делінген хатта. «Генералдар кеңесі» респуб­ли­калық қоғамдық бірлестігі өзіне офицерлерден, сарбаздардан, әскери бөлімдерден және күш құрылымдарынан келіп жат­қан хаттарда тұрақты дамуды, Отанымыздың биік беделін тіке­лей Жоғарғы Бас қолбасшының есімімен байланыстыратындары атап өтілгенін хабарлайды. «Біз сайлау өткен жағдайда азаматтардың Мемлекет басшысына сенімін, қолдауын және құрметін растайтын құжатқа еш күмәнсіз қол қоямыз», – деп жазады авторлар. Студенттік спорт федерациясы біріктірген қазақстандық жоғары оқу орындарының барлық  спортшы студенттері президенттік сайлау өткізу елімізде спортты дамыту жөніндегі кеуделі жобаларды табыс­ты жүзеге асырудың кепілі болып саналатын Қазақстан қоғамындағы тұрақтылықты сақтауға септігін тигізетінін атап өткен. «Өз еліміздің патриоты және Сіздің саяси бағдарыңыздың жақтаушысы бола отырып, Сізге 2017 жылы Дүниежүзілік қысқы универсиаданы өткізу туралы идеяны жүзеге асырғаныңыз үшін алғыс айтамыз. Соның арқасында біз туған жерімізде өнер көрсету мүмкіндігіне ие болдық. Испанияның Гранада қаласында өткен Дүниежүзілік универсиадада жоғары үшінші орынды иеленген біздер өз Отанымызда бұл нәтижені жақсартуға тырысамыз. 2017 жылғы Дүниежүзілік қысқы универсиаданы табысты өткізу және 2022 жылы Қысқы Олимпия ойындарын Алматыда өткізу құқығын иелену мүмкіндігін біз Сіздің атыңызбен ғана байланыстырамыз», – деп жазады студенттер. «Қазақстан мүгедектері ұйым­дарының одағы» бірлестігі, «Жоғары білімі бар мүгедектердің «Намыс» қо­ғамдық бірлестігі» және «Мен өмір­ді сүйемін» қоғамдық қоры бас­шылары бүгінде республикада мүм­кіндігі шектеулі адамдардың то­лыққанды өмір сүрулері үшін бар­лық жағдай жасалып жатқанын айтады. «Елімізді дамыған 30 мемлекеттің қатарына қосу жөнінде биік мақ­сат­тар мен міндеттер белгілей отырып, біз іргелі мүмкіндіктерге иеміз. Елі­мізде өмір сүру деңгейі ұдайы өсіп келеді. Мүмкіндігі шектеулі адам­дардың кәсіпкерлердің қатарын толтыруы біз үшін дәстүрлі жайт­қа айналған. Бұлар Сіздің қолдауы­ңыздың арқасында еліміз бен қоғам­ды дамытуға өз үлестерін қосуға мүмкіндік алған белсенді әрі мақ­саткер азаматтар. Біз Сізге сенеміз, елі­міздің болашағын Сізбен ғана бай­ланыстырамыз», – делінген хатта. Қызылорда облысының Аза­мат­тық альянсы ел болашағы үшін маңызды сайлаудың қажеттігін атап өткен. «Біз республикада қабылданып жатқан әлеуметтік-экономикалық шешімдерге әрдайым айрықша мән беріп келдік және сайлау өткен жағдайда оған барынша белсене қатысуға дайын екенімізді білдіреміз», – деп жазады авторлар. Алматы облысының бірқатар этномәдени бірлестіктерінің басшылары республикамыз өркендеп, қоршаған ортаның жақсаруы үшін қажетті нәрсенің бәрі – адами және материалдық ресурстар, күш-қуат бар екенін атап өткен. «Сіздің сындарлы саясаты­ңыздың арқасында біздің бәрімізді бүгін тәуелсіз Қазақстан үшін мақтаныш сезімі біріктіреді. Елбасымен бірге болу арқылы біздің еліміз бұдан да күшті бола түседі», – деп жазады авторлар. Оңтүстік Қазақстан облысынан да хаттар көптеп келді. Мәселен, көпбалалы аналардың бір тобы елімізде мемлекет тарапынан ұдайы жасалып отырған қолдаудың арқасында балалардың саны жылдан жылға өсіп келе жатқанын айтқан. «Қазақстанның, татулық пен бірлік идеясын нығайта беретін балаларымыз бен немерелеріміздің болашағы үшін Сіз елімізді бұдан да жоғары биіктерге жеткізетініңізге сенімдіміз», – делінген хатта. Осы өңірдегі жастардың өкілдері Мемлекет басшысының елді табыс­ты дамытудағы рөлінің жоғары екеніне тоқталған. «Сіз еңбек жолыңызды Қазақстан Магниткасында қарапайым жұмыс­шы болудан бастағаныңызды әр­қайсымыз да білеміз. Сіздің өмір жо­лыңыз еңбекқорлықтың, мақсат­кер­ліктің, қоғамға қызмет етуге деген тал­пыныстың, өз халқының игілігі үшін қажырлы еңбектің мысалы бо­лып саналады. Сіздің жастарға қатыс­ты қамқорлығыңыз бен қол­дауыңыз еліміздің болашағымен тікелей байланысты», – деп жазады авторлар. Мүмкіндігі шектеулі адамдардың бастамашыл тобының хатында Мемлекет басшысының жан-жақты қолдауы халықтың осы тобының өкілдеріне өмірдің барлық салаларына белсене қатысуға мүмкіндік беретіні айтылған. «Біздің елімізде мүмкіндігі шектеулі адамдардың мансабын жалғастырып, кәсібінде табыс­қа жете алуы үшін бәрі жасалуда. Қоғамға пайдалы бола алатын­дығымыз үшін шексіз қуаныш­ты­мыз. Біз үшін Сіз халыққа, туған елге қылаусыз қызмет етудің жар­қын мысалы боласыз. Барлық қазақ­стандықтардың шексіз сенімі мен сүйіспеншілігі Сіздің мызғымас беделіңіздің айғағы. Біз алдағы уақытта да Қазақстанды Сіздей адамның басқарғанын қалаймыз», – деп жазады авторлар. Осы өңірден келген тағы бір хатта бірқатар этномәдени бірлестіктердің басшылары президенттік сайлау өткізу туралы бастаманы қуана қабыл алғандарын және татулық, бірлік, келісім мен тұрақтылық саясатын қолдауға дайын екендерін айтқан. «Бүгінде біздің ел 130 халықтың тату тіршілігінің үлгісі болып отыр. Бұл – татулық, толеранттылық және келісім идеалдарының жақ­таушысы ретіндегі Сіздің еңбегіңіз. Қазақстанның басты құнды­лығы, оның байлығы мен страте­гиялық басымдығы халықтың әралуан­дығы болып табылады. Бұл – баға жетпес адами капитал. Сіздің сая­сатыңыздың арқасында біз бірлікте өмір сүреміз, ал еліміз табыс­ты мемлекетке айналып отыр. Өз болашағымызды біз Сізбен ғана байланыстырамыз», – делінген хатта. Астана жастарының іскерлік кеңесінің мүшесі Ж.Амантай Қа­зақстан Президентінің басшы­лығымен еліміз барлық қиындық­тарды еңсеріп, жаңа биіктерге шығатынына сенім білдірген. «Сіздің сайлауға қатысуыңыз Қазақстан халқының игілігі үшін, бүкіл ел қарапайым халықтың өкілі ретінде менің пікіріммен келісетініне сенімдімін», – деп жазады автор. Сонымен қатар, Алматы қала­сының бір топ тұрғыны да өз қол­дауларын білдіріп, Мемлекет басшысының көреген саясаты Қазақстанның барша халқының игілігі үшін жалғасатынына сенімді екендерін айтқан. «Өтінеміз, лауазымыңызда ұзақ қызмет етіңіз. Біз Сізге бірауыздан дауыс беруге дайынбыз», – деп жазады авторлар. Қазақстан халқы Ассамблеясы Кеңесінің ел Президентінің сайлауын өткізу жөніндегі бастамасына байланысты Мемлекет басшысының атына келіп жатқан хаттардың  легі әлі жалғасуда.