Апаттың алдын алған Айдос

Жауапкершілік – адам бойындағы бағалы қасиеттердің бірі. Ал, қызмет барысындағы жауапкершілік қызметтестер алдында абыройлы етіп, табысқа жетелейді. Ал кейде бұл қасиеттің адам өмірін сақтап қалуы да мүмкін. «Қазақстан темір жолы» ҰК» АҚ-ы Жамбыл филиалының қызметкері Айдос Сұлтанбеков бұл сөзімізге дәлел бола алады. Айдос Жамбыл вагон пайдалану депосының Жамбыл стансасындағы өндірістік-техникалық орталығының (ПТО) вагон қараушысы. Соңғы үш жылдың көлемінде аталмыш кәсіпорында өз мамандығы бойынша еңбек етіп келе жатқан ол күнделікті вагондардың жүріс бөлігін тексерумен айналысады. Алайда, шілденің 24-нен 25-іне қараған түні кезекті тексерістердің бірінде жас маман қырағылығының ар­қасында ауыр апаттың алдын алды. Анығын айтқанда, ол мекеменің 11-жолына келіп тоқтаған жүк пойызының вагондарын тексеру кезінде №28082428 вагонның бүйір рамасының сынығын байқап, дер кезінде ескерте білген. Кәсіпорынға Айдосты іздеп бар­ғанымызда, ауысым­мен жұмысқа түскен сәті екен . – Мен жұмыс істегелі бері мұндай ірі көлемде ақау анықтаған емеспін. 11-жолға тақ пойызды хабарлап, жүк пойызы келіп тоқтады. Бас автоматшы ретінде вагондарды қарап келе жатып басынан санағанда оныншы вагонның бүйір рамасындағы сынықты көзім шалды. Бұл жайында аға нұсқаушыға хабар бердім. Іле операторға хабарлап, вагонды шешіп, 41-ші жолға қойдық. Шындығында, мұндай жағ­дай­ды бай­қамағанымызда, вагонның жолдан шығу қаупі бар еді. Оның үстіне қатты жылдамдықта келе жатып құлаған вагон қарсы беттегі жолаушылар вагондарына да зақым келтірер еді. Вагондар Украинада жа­сал­ған. 2013 жылдан бері қолданыста жүр. Әлі деполық қараудан өтпеген. Деполық қарау бұл вагондарға 2016 жылға жоспарланған екен. Өзімнің таңдаған мамандығым «вагон қараушы». Сондықтан, болат жолдың бойында үш жыл еңбек етсем, алдағы ең­бек жолымды осы саламен тығыз байланыстырамын деген ойдамын. Өз кәсібіме адал болғым келеді. Оның үс­тіне нұсқаушыларымыздың өткізген әрбір техникалық сабақтарынан білмегенімізді көңілге түйіп, шеберлігімізді шыңдап келеміз, – дейді Айдос. Жалпы, Жамбыл вагон пайдалану депосының вагон қараушылары 2014-2015 жыл аралығында 43 бүйір рамасының ақауын анықтаған екен. Қырағы ма­мандардың жұмыс сапасын арттырудағы үлесі осындай. Сондықтан, депо басшылығы теміржолшылар қауымының төл кәсіби мере­кесінде вагон қараушы Айдос Сұлтанбаевты «Қозғалыс қауіпсіздігі үшін» төсбелгісіне ұсынды. Бұл құрметке әбден лайық Айдос Астанаға барып, «Қазақстан темір жолы» «ҰК» АҚ пре­зиденті Асқар Маминнің қо­лынан аталған төсбелгіні алып келді. Оралхан ДӘУІТ, «Егемен Қазақстан». Жамбыл облысы.