Неміс велосипедшісі  

ЭКСПО-2017 көрме кешенін көруге келді Энергиямен жабдықтау, орталықтан жылыту және телекоммуникациялар саласындағы «жасыл» технологиялармен айналысатын RTS неміс компаниясының қызметкері Фолькер Штюве ЭКСПО-2017 құрылыс алаңына арнайы сапармен келді. Шілденің басында ол туған қаласы Билефельдтен (Германия) шығып, Астанаға дейінгі 5 200 шақырымдық жолды жарыс велосипедімен жүріп өтті. Штювенің осындай саяхатқа шығуының басты мақсаты – Аста­нада өтетін халықаралық көр­менің салынып жатқан нысандарымен танысып, негізгі тақырып «Болашақтың энергиясы» туралы көп мағлұматтар алу. Велосипедші 40 күнге созылған саяхатын 4 шілде күні RTS ком­паниясының Билефельдтегі штаб-пәтерінен бастады. Балтық елдері мен Ресей аумағын басып өткен ол 8 тамызда Астанаға жетті. Оны «Екатеринбург-Астана» тасжолында бір топ жергілікті велосипедші қарсы алып, елорданың орталық көшелерімен жүріп өтті. Саяхатын көрменің құрылыс алаңында аяқ­таған Штювені ол жерде «Астана ЭКСПО-2017» ұлттық компа­ния­сының өкілдері күтіп тұрды. «Біз сізбен ЭКСПО-2017 аума­ғында қауышқанымызға қуаныш­тымыз. Сіз экологиялық таза көлік және жасыл технологиялар дәуірі басталғанының жарқын үлгісін көрсетіп отырсыз. Астанада өткі­зі­ле­тін көрме тәжірибе алмасу мен инно­вациялық жетістіктерді көрсетуге арналған жаһандық алаң­ға айналатын болады», – деп атап өтті «Астана ЭКСПО-2017» ұлт­тық компаниясының өкілі Сәуле Бөлебаева. Сондай-ақ, құрылыстың қар­қыны туралы әңгімелеген ол қо­нақ­қа арнайы естелік сыйлықтар табыс етті. Бұдан бөлек, неміс велосипедшісі салынып жатқан нысандармен танысып, кешенді аралап көрді. Веложорықтың соңғы 100 шақырымында Штювеге оның әріптесі, RTS компаниясының басшысы Дирк Шаумбург қосылды. Компанияның геотермалды жылу- мен қамтамасыз ететін өнімі ЭКСПО-2017 нысандар құры­лы­с­ы­н­да пайдаланылады деп жос­парланған. Бұл технология салы­нып жатқан ғимараттарда қолай­лы ауа ортасын қалыпта ұс­тау үшін тереңдігі 120-130 метр­лік 85 ұңғыманы бұрғылау кезін­де қолданылатын болады. Көрме кешенінің нысандары ішінде бірінші болып аяқталуы тиіс «Көрмені ұйымдастыру кең­сесінің» құрылысы біткеннен ке­йін аталған технологияның артық­шылықтарын толық бағалауға мүмкіндік туады. «Құшақ жая қарсы алып, экскурсия ұйымдастырғандарыңыз үшін алғыс білдіремін. Қазірдің өзінде ЭКСПО-2017 жобасы өзінің ауқымымен, мақсаты биік жоспарларымен таңғалдыруда. Маған нысандарды 2017 жылы салынып біткен күйде көру аса қызықты болып тұр. Сондықтан екі жылдан кейін отбасыммен Астанаға міндетті түрде келемін. Қалаға кірген бойда қолға алынған бастамалардың ауқымды екенін байқадым. Дегенмен, сіздерді алда әлі талай жұмыстар күтіп тұрғаны белгілі. Келешектегі игі істеріңіздің нәтижесі күткендегіден асып түсетініне сенімдімін. Кешенмен танысқаннан кейін Қазақстанның құрылыс барысында қуат көзінің тиімділігіне және экологиялық таза өнім мен технологияларды қолдануға айрықша мән беріп отырғанына көз жеткіздім», – дейді Фолькер Штюве. ЭКСПО-2017 көрмесінің тақы­рыбы «Болашақтың энергиясы» екендігін назарға алған неміс сая­хатшысы өзінің веложорығын экологиялық таза технологияларды қолдануға қосқан үлесі деп есептейді. Еламан ҚОҢЫР, «Егемен Қазақстан».