АСТАНА. 23 наурыз. Кәсіпқой бокстан орта салмақта IBO, WBA (Super) және WBC (Interim) тұжырымдары бойынша әлем чемпионы Геннадий Головкин келесі жекпе-жегін 16 мамыр күні америкалық Вилли Монроға қарсы өткізетіні белгілі. Таяуда қарсыластардың қатысуымен АҚШ-та алғашқы баспасөз мәслихаты өтті. Аталған шарада отандасымыз Монро туралы пікірін білдірді. Бұл туралы egemen.kz хабарлады.
«Монромен болатын айқас аса тартысты болады деп сенемін. Жанкүйерлерім де осы жекпе-жекті асыға күтіп отыр. Бұл кездесудің екі-үш раундқа ғана созылмайтыны белгілі. Себебі, қарсыласым ашық айқасқа түспейтін, жабық боксшы. Оның бокстасу мәнерін кубалық тәсіл десе де болады. Өйткені, оның шаршы алаңдағы әдісі белгілі кубалықтар Гильермо Ригондо мен Эрисланди Лараға ұқсайды. Сондықтан Вилли маған да, Канело Альвареске де оңай қарсылас болмайды», – деді Головкин.
Айта кетейік, қос боксшы арасындағы айқас 16 мамырда Инглвуд (АҚШ) қаласындағы 17 мың орындық The Forum аренасында өтеді. 28 жастағы Вилли Монро бүгінге дейін кәсіпқой бокста 20 кездесу өткізіп, соның біреуінде ғана жеңілген. Солақай боксшы орта салмақта Boxcino-2014 турнирінің жеңімпазы.
Ал Головкин соңғы кездесуін 22 ақпан күні Монакода Мартин Мюррейге қарсы өткізді. Бүгінге дейін 32 жекпе-жек өткізіп, бәрінде жеңіске жеткен қазақстандық боксшы 16 мамырда өзінің чемпиондық атағын 14-рет қорғау үшін жұдырықтасады.
Еламан Қоңыр.
Дерек: egemen.kz.
Сурет: boxingplanet.ru.
