Қазақ өнерінің жауһарлары орындалған бұл кеш екі ел арасындағы мәдени байланыстарды одан әрі тереңдеткен маңызды оқиғаға айналды. Концерт бағдарламасы ұлттық дәстүр мен заманауи музыкалық ізденістердің үйлесімін айқын көрсетті. Сахнада республикалық және халықаралық байқаулардың лауреаттары, танымал әрі жас өнерпаздар өнер көрсетіп, қазақ музыкасының тереңдігі мен көркемдік қуатын әйгіледі. Кеш барысында дәстүрлі ән-күй жаңаша өңдеуде ұсынылып, көрерменге ерекше әсер сыйлады. Атап айтқанда, күй атасы Құрманғазы Сағырбайұлының өршіл күйлері, сал-серілік дәстүрдің көрнекті өкілі Үкілі Ыбырайдың сырлы әндері, қобыз сарынымен мәңгілікті толғаған Қорқыттың мұрасы, ұлт рухын жырлаған Сәкен Сейфуллин шығармалары мен Нұрғиса Тілендиевтің заманауи ұлттық музыкасы орындалды. Сонымен қатар қазақ және түрік халық әндері әуелеп, екі халықтың тарихи-мәдени тамырының ортақтығын айқын сездірді.
Кешке жиналған көрермен қауым қазақ өнерінің терең философиясына, әуен мен ырғақтың бай бояуына тәнті болды. Әрбір орындалған шығарма ұлттық болмыс пен рухты танытып, шетелдік тыңдарманға қазақ халқының тарихы мен дүниетанымынан сыр шертті.
Аталған мәдени іс-шара Қазақстанның музыкалық мұрасын халықаралық аренада насихаттауға, сондай-ақ қазақ-түрік арасындағы мәдени-гуманитарлық ынтымақтастықты нығайтуға бағытталған маңызды қадам болды. Ыстанбұл төрінде өткен бұл концерт қазақ өнерінің әлемдік мәдени кеңістіктегі орны айқын екенін тағы бір мәрте дәлелдеді.
