Дариға Назарбаева «Астана Опера» театры ұжымымен бірге ардагерлерге қайырымдылық концертін ұйымдастырды
Ұлы Жеңістің 70 жылдығына жеткен аяулы ардагерлерге биыл көрсетіліп жатқан құрмет пен қошеметтің бар түрі де жарасымды болып тұр. Өз кезегінде ақ самайлы ардагерлерімізге «Астана Опера» театрының оркестрі мен хоры Дариға Назарбаевамен бірге ерекше концертті сыйға тартты. Ол концерттің телевизиялық нұсқасын «Хабар» арнасы көрермен назарына ұсынды.
Қалай десек те, хас таланттар мен қасіреттті тағдырлар тудырған майдан әуендері Дариға Назарбаеваның жүрегіне ерек жақын екенін білеміз. Егер елдің есінде болса, Дариға Назарбаеваның ең алғашқы жеке концерті де 2001 жылы Ұлы Жеңістің құрметіне арналған болатын. Шындығында да талантты, дарынды жан жыл сайын осы үрдісті жалғастырып, өзінің ерекше құрмет тұтатын тыңдармандарына қайырымдылық концерттерін өткізіп тұруды дәстүрге айналдырды. Одан түскен қаражат та Ұлы Отан соғысы ардагерлерінің қорына түсіп отырады.
«Ұлы Жеңіске арнау...» атты концерттің әрбір әні ғасыр тудырған әуендерден құралып, тыңдаушыларын шексіз эмоцияға шомылдырып, көздерге бүгінге тәубе айтқан қуаныш пен кешегімізге салауат айтқан сағыныштың жасын үйірді. Майдан мелодиялары оларды бірде махаббат пен соғыс сұрапылы арпалысқан жастық шаққа саяхат шеккізіп, бірде қандыкөйлек жолдастарымен қауыштырып, бірде осы күнге жеткізген жазмыштың қуанышына бөледі. Концертті Дариға Назарбаева «Ана туралы баллада» әнімен ашты. Сөзін ақын А.Шамкенов жазып, әнін сазгер Ж.Сейілов шығарған туындыны меццо-сопрано дауысты дарын иесі әдемі орындап, өзінің аға буынға деген шексіз де шынайы алғысын білдірді. Осылайша тарихқа тағзым етті, бір сәт болса да аяулы ардагерлерімізге ерекше көңіл-күй сыйлады. Омыраулары орденге, кеуделері қазыналы естеліктерге толы батагөй қарияларымыз талантты қыздарына риясыз қол соқты. Мәңгілік айтыла беретін, ешқашан ескірмейтін майдан әндері, Отанға деген шынайы сүйіспеншіліктен туған шығармалардың барлығы да өлмейтін нағыз махаббаттың құдіретімен суарылған. Сондықтан да хас таланттар тудырған концерттік бағдарламаның талғампаз репертуары тыңдаушыларының да көңілінен шықты. Өйткені, осынау концертте әрбір әннің өз тағдыры болса, орындаушылары да оны жүрегімен жеткізді. Бүкіл бір дәуірдің қуанышы мен қасіреті алмасқан драмасы әннің тілімен ардагерлерге тарту етілді. Әсіресе, ардагерлерге «Қайықта», «Әнім сен едің» және «Ауылым» мен құлаққа жылы тиетін «Синий платочек», «Жди меня», «В городском саду», «Смуглянка», «Старый парк», «Старинный вальс», «Вальс о вальсе», «Песни издалека» сияқты үлкен орындаушылық шеберлікті талап ететін тамаша әндер аға буынға естен кетпес үлкен әсер сыйлады. Концерт әдемі естеліктермен өріліп отырылды. Концертке «Астана Опера» театрының музыкалық жетекшісі, Қазақстанның еңбек сіңірген қайраткері Абзал Мұхитдинов дирижерлік етіп, сахналық қойылымдарды Қорғаныс министрлігінің Орталық ансамблінің музыканттары мен бишілері көркемдеді. Әйгілі пианист Тимур Урманчеев «Қараторғай» арқылы музыкалық шеберлігін паш етті. Оның үстіне бүгінде салтанаты келіскен «Астана Опера» залы мен театрдың айтулы солистері концерттің салмағын асырды. Дариға Назарбаева замана әуендері шырқалып жүрген әрі мемлекетіміздің де мақтанышы болып табылатын осынау бекзат сахнаның саңлақтары – Медет Шотабаев, Мейір Байнеш, Андрей Трегубенко, Азамат Жылтыркөзов, Игорь Благодарный сынды нағыз таланттармен бір деңгейде шырқап, ардагерлеріміздің қошеметіне де бөленді, батасын да алды.
Айнаш ЕСАЛИ, «Егемен Қазақстан».
АСТАНА.
