Атырау аэропортына Хиуаз Доспанованың есімі берілді

АСТАНА. 13 мамыр. Атыраудағы халықаралық аэропортқа Халық Қаһарманы, Ұлы Отан соғысының ардагері, қазақтың даңқты ұшқыш қызы Хиуаз Доспанованың есімі берілді. Бұл туралы liter.kz хабарлады. Аталған аэропортта Ұлы Жеңістің 70 жылдығына орай мерекелік шара ұйымдастырылып, сол жерде қуанышты жаңалық жария етілді. Аэропорт басшылығының айтуынша, оларға облыстық әкімдіктен хат келіп түскен. Онда бастамашы топ пен Парламент депутаттарының Хиуаз Доспанованың есімін беру туралы ұсыныстары айтылған. Бұл ұсынысты аэропорт қызметкерлері бірауыздан қолдап, мақұлдады. Хиуаз Доспанова 1922 жылы 15 мамырда сол кездегі Гурьев (қазіргі Атырау) облысына қарасты Ганюшкин ауылында туған. 1940 жылы Орал қаласындағы №1 мектепті алтын медальмен бітірген. Кейін Мәскеудегі Жуковский атындағы әскери-әуе акадмеясына құжат тапсырады. Алайда, академия қыз баланы қабылдаудан бас тартады. Есесіне, Бірінші Мәскеу медициналық институтына емтихансыз қабылданады. Зұлмат жылдарда 588-ші түнгі бомбалаушы әуе полкінің штурман-атқышы болды. Жау тылында көптеген әскери тапсырмаларды орындаған. Екі рет ауыр жарақат алып, қайтадан сапқа қосылған. Жеңісті Берлин түбінде қарсы алды. Ерен ерлігі үшін бірқатар наградалармен марапатталды. 2004 жылдың 7 желтоқсанында Қазақстан Президентінің Жарлығымен Халық Қаһарманы атағы берілді. Хиуаз Доспанова 2008 жылы 20 мамырда қайтыс болды. Қазіргі таңда Атыраудағы спорт сарайы және «Эйр Астана» әуе компаниясының «Еmbraer 190» лайнері батырдың есімімен аталады. Еламан Қоңыр. Дерек: liter.kz. Сурет: headline.kz.