«Арглабиніміз» бар біз дайынбыз

Дүниежүзілік сауда ұйымына мүше болуымыз біздің ұжымды да үлкен қуанышқа бөледі. Шын­дығын айтқанда, көптен бергі тілеуіміз де осы еді. Өйткені, әлем­нің бірнеше елінде патенттелген, соның ішінде зор сұранысқа ие «Арглабин» дәрісінің кең ауқымда танылуында кедергілер кездес­пей қалмай жүретін. Нарықтық бәсекеде танымал шетелдік фито­препараттардың біразынан шипа­лық қасиеті жағынан кем соқ­пайтын дәрі-дәрмектерімізді тал­ғампаз тұтынушылардың таңдап ала алуына жол ашылуы отандық фармацевтика өндірісін жаңа көк­жиектерге бастайтындығымен көңіл өсіреді. Осынау ұйым бере­тін артықшылықтарды пайдалана білуге құштар едік, енді сәті түсіп отыруы іс-ізденістерді одан сайын еселеуге ұмтылдырады. Қазір бізде жаһандық нарық талаптарына сай болуға толық жағдай бар деуге болады. Ауру­лардың бірнеше түрлерін емдеу­ге қолданылатын дәрілерді кең көлемде жасайтын өндірістік буын қалыптасты. Жұмысымызды жақсы білетін Елбасының тікелей қамқорлығы арқасында үш ірі цех іске қосылды. Заманауи ме­дициналық құрал-жабдықтар өнімдердің сапалы әрі көзге түсімді өндірілуіне мүмкіндік беріп отыр. Іріктеліп алынған мамандардың кәсіби шеберлігі жоғары деңгейде. Жер­гілікті табиғи өсімдіктерден да­йын­далатын дәрілік заттарға шикі­зат жеткілікті. Олар да өзімізде жасалады. Яғни, нағыз фарма­цев­ти­калық бірегей орталық ретінде алыс­қа таныла аламыз. Мақса­ты­­мыз да осы. Өнімдері өтімді озық ­кә­­сіпорындардың қатары­нан ла­йық­­­­­­­ты орын алатынымызға сенеміз. Қазақстанымыздың ортақ же­тістігіне тілеулес болғандықтан басқа салалардың да бәсекеге дайын болуын ойлаймыз. Алайда, оған бәрі бірдей сақадай-сай еместігі өкінтеді. Қиындықтарға тап болушылар аз болмайтын тәрізді. Өмір көндірмейтін, үйретпейтін жағдай жоқ десек, бұл сынақтан да өте білуіміз керек. Еліміздің өсіп-өркендеуіне жол ашар жаңа қадамға үлес қосуға қажымас ұмтылыс қажет. Бораш Тілеуов, Қарағанды қаласындағы халықаралық ғылыми-өндірістік «Фитохимия» холдингінің зертхана меңгерушісі, химия ғылымдарының докторы. ҚАРАҒАНДЫ.