Жарыстың алғашқы күнінде-ақ 19 жастағы Солтүстік Қазақстан облысының тумасы 500 метрлік қашықтықты 38.48 секундта бағындырып, алтыннан алқа тақты. Бұл – қазақ спортындағы елеулі оқиға. Отандық конькишілер соңғы рет жастар арасындағы әлем біріншілігінде осыдан 16 жыл бұрын, яғни 2010 жылы топ жарған еді. Екатерина Айдованың сол ерлігін араға жылдар салып Кристина қайталап отыр. Бұл бәсекеде канадалық Джулия Снелгров (38.78) күміс, польшалық Виктория Дабровска (38.96) қола жүлдеге ие болды.
Жеңісті күндер мұнымен шектелмеді. 1 500 метрлік сайыста жерлесіміз 1:56.06 уақыт көрсеткішімен тағы да шашасына шаң жұқтырмады (аустриялық Джанин Роснер – 1:56.36, жапониялық Аяно Секигучи – 1:57.97). 1000 метрде 1:16.34 нәтижесімен бас жүлдені үшінші мәрте қанжығасына байлады. Бұл қашықтықта күміс пен қола медаль жапониялық Аяно Сэкигучи (1:16.66) мен аустриялық Джанин Роснерге (1:17.00) бұйырды.
Айта кетерлігі, К.Шумекова Инцелльде жеке рекордын да жаңартты. 3 000 метрлік додада күміс жүлдені қанағат тұтқанымен, жекелей қашықтықтар жиынтығы жөнінде жерлесіміз теңдессіз деп танылды. Бұл – ел спортының тарихында бұрын-соңды болмаған тарихи оқиға! Осындай айтулы жеңістен соң Мемлекет басшысы Қасым-Жомарт Тоқаев дарынды конькишімізді орасан зор табысымен арнайы құттықтап, алдағы додаларда сәттілік тіледі.
Одан кейін құрамында Кристина Шумекова, Анастасия Беловодова, Варвара Глухова бар еліміздің қыздар құрамасы командалық спринтте топ жарды. Құрама қоржынына түскен алтыншы алтынға масс-стартта жеңіске жеткен Вадим Чебардаков ие болды.
