«Eurasian Resources Group» Павлодарда 8 тұрғын үй салады

ПАВЛОДАР. 26 маусым.  Облыс орталығында «Eurasian Resources Group» және облыс әкімдігі арасында Тұрғын үй құрылысы бағдарламасын жүзеге асыру бойынша меморандумға қол қойылды. Бұл туралы egemen.kz тілшісі хабарлады. Енді Еуразиялық топ кәсіпорнының мамандарына арналған үйлер тұрғызбақ.  Тұрғын үйлер мемлекеттік «Өңірлерді дамыту бағдарламасы-2020» бағдарламасы шеңберінде салынады. Облыстағы «Қазақстан Алюминийі», «Қазақстан электролиз зауыты», Ақсу ферроқорытпа зауыты, «Еуроазиаттық энергетикалық корпорация» АҚ-ның өкілдіктері орналасқан Павлодар, Ақсу және Екібастұзда құны 4,47 млрд теңгені құрайтын инвестициялық қаржы құйылмақ. ERG менеджерлер кеңесінің төрағасы Александр Машкевичтің айтуынша, облыста тұрғын үйдің 36 мың шаршы метрін салу жоспарлануда. Өңірде 640 адам пайыздық мөлшерлемесі төмен шартпен баспаналы болады. Фарида Бықай. Дерек, сурет: egemen.kz