ҚОСТАНАЙ. 13 мамыр. Қостанайда Чернобыль апатын сөндіруге қатысқан жерлесіміз, Кеңес Одағының Батыры Леонид Телятниковке ескерткіш тақта қаладағы №2 мамандандырылған өрт сөндіру бөлімінің ғимаратына ілінді. Бұл туралы egemen.kz тілшісі хабарлады.
Леонид Петрович Телятников Қостанай облысы Меңдіқара ауданындағы Введен селосында 1951 жылы туған. КСРО ІІД Свердлов өрт-техникалық училищесін, одан кейін Мәскеудегі инженерлік өрт-техникалық жоғары мектебін бітірген. 1971 жылдан 1982 жыл аралығында Қостанай облысының өрттен қорғау гарнизонында қызмет етті. Ол 1986 жылғы сәуірде болған Чернобыль атом станциясындағы өрт апатын жою жұмыстарына басшылық еттті. ХХ ғасырдағы ең ауыр техногендік апаттың басты ауырлығын осы бөлімше көрген еді. Қайғылы оқиға уақытында Леонид Телятников АЭС жанындағы өрт бөлімі бастығы болатын. Өзі және оның қарамағындағылар 4-ші энергоблок апатына тікелей жақын жерде орналасты. Өрт сөндіру барысында олар, өте көп мөлшердегі сәуле қабылдады. Өрт сөндірушілер өз денсаулығының және өмірін құрбан ете отырып, от алауының жақын нысандарға таралуына жол бермеді және жаңа жарылыстың алдын алды.
Ескерткіш тақтаның ілінуіне қатысты мерекелік іс-шараға облыстық ТЖД басшылығы, азаматтық қорғау органдарының ардагерлері, Қостанай облысы өртке қарсы қызмет гарнизонының офицерлері қатысты.
Департамент бастығының орынбасары полковник Виктор Шиллер Леонид Телятниковке арналған мемориалдық тақта болашақ ұрпақтың ядерлік энергетиканың тарихында болған Чернобыль апатының батыры, патриот, жігерлі жеке тұлға туралы естеріне салатынын айтты.
Азаматтық қорғау органының ардагерлері Леонид Телятников туралы естеліктер айтты. Олар өткен ғасырдың 70-ші жылдары Леонид Петровичпен бірге жұмыс істеген еді. Әріптестер оның өз ісін шексіз сүйген және әр уақытта дайын, батыл және тәртіпті адам болғандығы туралы айтып өтті.
Нәзира Жәрімбетова.
Дерек, сурет: egemen.kz
