Келіссөздер жемісі

Кеше Премьер-Министрдің орынбасары Б. Сапарбаев «Каннам Северанс» клиникасы мен денсаулық индустриясын дамыту институтының және халықаралық денсаулық орталығының басшыларынан тұратын Корея Республикасының делегациясымен кездесті. Қазақстан тарапынан кездесуге Денсаулық сақтау және әлеуметтік даму, Білім және ғылым министрліктерінің, сондай-ақ, әл-Фараби атындағы Қазақ мемлекеттік университетінің басшылары қатысты. Келіссөздер жүргізу барысында тараптар Қазақстан мен Кореяның денсаулық сақтау саласында қарым-қатынастың  қарқынды дамып келе жатқанын атап өтті. Бейінді министрліктердің арасында бекітілген меморандумдар аясында Кореяның емханаларында қазақстандықтарды емдеу, сонымен қатар, отандық мамандарды оқыту жүйелі түрде жүргізіледі. 2014 жылғы желтоқсанда әл-Фараби атындағы Қазақ мемлекеттік университетінің негізінде аталған университет пен Каннам Северанс емханасының бірлесуімен диагностикалық орталық ашылды. Қазіргі таңда аталған емдеу мекемесімен өзара байланысты Шығыс Қазақстан облысы бел­сенді жүзеге асырып келеді. Бұл өңір­дің аудандарында тұратын халық үшін корей дәрігерлерінің қаты­суымен шеберлік сыныптары, емделушілерге кеңес беру бой­ынша қабылдаулар ұйымдас­тырылады. Сонымен бірге, Өске­мен қаласында орналасқан Оңал­ту орталығына мамандар даяр­ланып, облыстық емханаға қым­бат диагностикалық жабдық сый­ға тартылған. Осы жылы Қазақ­станға «Каннам Северанс»  емхана­сындағы атақты дәрігерлердің күрделі операциялар жасауға тегін негізде келуі жоспарланған. Сондай-ақ, кездесу барысында екіжақты қарым-қатынастарды одан әрі нығайту және дамыту, сонымен қатар, медициналық ор­талықтың құрылысы және өңір­лердегі жедел жәрдем жүйесін мо­дернизациялау жобаларын іске асыру мәселелері талқыланды, деп хабарлады Премьер-Министрдің баспасөз қызметі.