Қостанай облысында Сергей Амеличкинге ескерткіш орнатылды

ҚОСТАНАЙ. 13 мамыр. Қостанай облысының Алтынсарин ауданында Кеңес Одағының Батыры Сергей  Амеличкинке ескерткіш орнатылды. Бұл туралы egemen.kz тілшісі хабарлады. Батыр ескерткіші Алтынсарин ауданының орталығы Обаған селосының орталық гүлзарынан орын тепті. Ескерткіштің ашылуына аудандағы тыл ардагерлері, жалпы жұртшылық, аудан басшылары қатысты. Сергей Георгиевич Амеличкин - осы ауданнан  Ұлы Отан соғысына қатысқан майдангерлердің арасынан шыққан жалғыз Кеңес Одағының Батыры. Ол соғыс кезінде  1-танк армиясының 11-ші гвардиялық танк корпусы 1454-ші өздігінен жүретін артиллериялық полктағы СУ-85 жүргізуші-механигі, старшина болды. Амелдечкин Курс-Орёл отты доғасында қырғын соғысқа қатысты.  Оның осы ұрыста көрсеткен ерлігі «Қызыл Жұлдыз» орденімен аталып өтті. Ол қызмет еткен 11 танк полкі гвардиялық мәртебесін алды. Еуропаны азат етуге қатысқан жерлесіміз Польшадағы Пилицин өзенін кешіп өту кезінде көрсеткен ерлігі үшін Кеңес Одағының Батыры атағын алды. Сергей Георгиевич соғыстан Алтынсарин ауданына оралып, еңбекке араласты. 1981 жылы қайтыс болды. Нәзира Жәрімбетова. Дерек, сурет: egemen.kz