АСТАНА. 13 мамыр. Бүгін УЕФА Чемпиондар лигасының жартылай финалдық бәсекесі аясында екінші қарымта ойын өтеді. Соған сәйкес, Испания астанасы – Мадридте жергілікті «Реал» мен «Ювентус» (Турин, Италия) финал жолдамасын сарапқа салады. Бұл туралы egemen.kz хабарлады.
Турнирдің финалына Лионель Месси бастаған «Барселона» командасы шығып қойғаны белгілі. Олар жартылай финалда Мюнхеннің «Бавариясын» айналып өтті.
Ал «Реал» мен «Ювентус» арасындағы ойыннан кейін каталониялықтардың финалдағы қарсыласы белгілі болады. Туринде болған алғашқы ойында алаң иелері 2:1 есебімен жеңгені есімізде. Сондықтан бүгін Италияның командасы сәл де болса басымдыққа ие.
Осы ретте әдеттегідей, бүгінгі ойындағы кейбір қызықты деректерге назар аударуды жөн санадық.
- Қос команда Чемпиондар лигасының 2013-2014 жылғы маусымында бір топқа түсті. Сол кезде Мадридтегі ойында алаң иелері 2:1 есебімен басым түскен болатын. Ал Туринде қарсыластар тең тарқасты (2:2).
- Бүгінге дейін турнир аясында «Реал» мен «Ювентус» 17 мәрте кездескен. Мадридтіктер өз алаңында 5 рет жеңіске жетіп, 2 ойында есе жіберген. Аталған 5 жеңістің барлығы бір доп айырмашылығымен тіркелгенін айта кетейік.
- «Ювентус» 2002-2003 жылғы маусымнан бері Чемпиондар лигасының жартылай финалына шыққан жоқ. Сол кезде де туриндіктер финал жолдамасы үшін «Реалмен» ойнаған еді. Мадридте өткен алғашқы ойында 1:2 есебімен есе жіберіп, өз алаңындағы қарымта матчта жеңіске жетті (3:1). Нәтижесінде турнирдің финалына шықты.
- Массимилиано Аллегри жаттықтыратын «Ювентус» Лига аясында сырт алаңда өткізген соңғы 3 ойында қақпасына гол жіберген жоқ. Топтық кезеңде «Мальмені» 2:0 есебімен жеңсе, 1/8 финалда Дортмундте жергілікті «Боруссияның» қақпасына жауапсыз 3 гол соқты. Ал ширек финалда «Монакомен» тең ойнады (0:0).
- «Реалдың» қазіргі бас жаттықтырушысы Карло Анчелотти 1999-2001 жылдар аралығында «Ювентусті» жаттықтырды.
- Анчелотти мырза әртүрлі командаларды жаттықтырып жүріп, «Ювентуске» қарсы 25 ойын өткізген. Соның 6-уында оның командасы жеңіске жетсе, 7 мәрте тең есеп тіркелген. Ал 12 рет жаттықтырушыдан тәлім алған футболшылар «Ювентустен» жеңілген екен. Оның соңғысы апта бұрын тіркелгені белгілі.
- «Ювентус» сапындағы Альваро Мората «Реал» футбол мектебінің түлегі. Ол туриндіктердің қатарына өткен жылдың жазында қосылды. Оған дейін «Реал» сапында 37 ойын өткізіп, 10 гол соғып үлгерген.
Командалар мына құрамда алаңға шығуы мүмкін.
