Алматыда Батырхан Шөкеновті еске алу кеші өтеді

АСТАНА. 13 мамыр. Алматы қаласындағы Республика сарайының алдында Батырхан Шөкеновті еске алу кеші өтеді. Бұл туралы қалалық мәдениет басқармасына сілтеме жасап, tengrinews.kz хабарлады. Қазақстанның еңбек сіңірген қайраткері, әнші, музыкант әрі композитор Батырхан Шөкеновтің құрметіне арналған кеш 18 мамыр – өнер жұлдызының туған күні сағат 20:00-де басталады. Алғаш болып сахнаға қазақстандық Chick Flick тобы шығады деп жоспарлануда. Топ музыканттың бірнеше шығармаларын орындағаннан кейін Республика сарайының алдында «Батыр: Live» фильм-концерті көрсетілмек. Бұл фильмге әншінің сахнадағы сәттері, достары мен жақындарының қысқа сұхбаттары, сахна сыртындағы түсірілімдер, сондай-ақ, өзінің пікірлері енген. «Бұл күні Абай даңғылына келетін халықтан жеке автокөліктерін тастап, кеш өтетін жерге қоғамдық, муниципалдық көліктермен келулерін өтініп сұраймыз. Жұртқа қолайлы болуы үшін «Арман» кинотеатрының жанында аялдама, Республика сарайында жерасты тұрағы жұмыс істейді», – деп хабарлайды қалалық мәдениет басқарамысы. Сол күні әншіні еске алу кештері Мәскеу қаласы мен Қытайда да өтетінін айта кетейік. Батырхан Шөкенов 29 сәуірде 53 жасына қараған шағында жүрек талмасынан қайтыс болды. Еламан Қоңыр. Дерек, сурет: tengrinews.kz.