Қызылордада 2 күнде 48 адам әкімшілік жауапкершілікке тартылды

ҚЫЗЫЛОРДА. 13 мамыр. Қызылорда облысында «Қайыршы» жедел-профилактикалық іс-шарасы жүргізіліп жатыр. Бұл туралы egemen.kz тілшісі хабарлады. Іс-шараның 2 күнінде учаскелік полиция инспекторлары қоғамдық орында заң бұзғаны үшін 48 азаматты ұстап, оның ішінде 8 азамат жеке басы анықталмағандықтан қабылдау-тарату орталығына және 9 жасөспірім бейімдеу орталықтарына жатқызылды. Атап айтқанда, қала орталығындағы «Жаңа базар» аумағында «бал ашамын» деп өз қызметін күштеп таңып, халықтың мазасын алған тұрғынға қатысты әкімшілік құқық бұзушылық бойынша хаттама толтырылып, айыппұл салынды. Дәл осындай дерек Тәжікстан азаматшасының тарапынан да орын алған. Ол қала орталығында орналасқан Ескі базар аумағында қайыр тілеп, халықтың мазасын алып отырғаны үшін ұсталды. Осы бағыттағы жұмыстар 21-мамырға дейін жалғасатын болады. Іс-шараға 500-ден аса ішкі істер органдарының қызметкері жұмылдырылды. Ержан Байтілес. Дерек, сурет: egemen.kz.