Фото: СҚО әкімдігі
Мониторинг барысында Шал ақын, Ғабит Мүсірепов, Есіл, Айыртау, Ақжар, Уәлиханов және Тайынша аудандары, сондай-ақ Үлкен және Кіші Таранғұл өзен арналары, Шағалалы өзені және Ақмола облысындағы Сілеті су қоймасы қамтылды.
СҚО әкімі Ғауез Нұрмұхамбетовтің айтуынша, Үлкен Таранғұл көлінде ылғал қоры өткен жылмен салыстырғанда шамамен 74%-ға азайған. Есіл ауданында қар қорының қарқынды азаюы байқалып отыр. Қалған аудандарда тәуекелдер жергілікті сипатта, еріген қар сулары мен мұздың әлсіреуіне байланысты. Шағалалы өзенінде су деңгейі аздап көтерілді, бірақ өткен жылмен салыстырғанда төмен, мұз жамылғысы біртіндеп босаңсып келеді.
Су ресурстары және ирригация министрлігімен, сондай-ақ «Қазсушар» РМК Ақмола филиалымен бірлесіп қабылданған шешімге сәйкес, 28 ақпаннан бастап Сілеті су қоймасынан суды алдын ала жіберу басталды, бұл су тасқыны кезеңін қауіпсіз өткізуге мүмкіндік береді.
Мамандар болжамынша, 25 наурыздан бастап ауа температурасының көтерілуіне байланысты көктемгі үдерістердің белсенді кезеңі басталады. Барлық жауапты қызметтер жағдайды тұрақты бақылауда ұстап, күшейтілген режимде жұмыс істеп жатыр.
