Шаттық шуағындағы шаһар

Тәуелсіз еліміздің айбары мен айдынына айналған Астана төрткүл дүние түгел таныған бейбітшілік пен ізгілік ордасына айналды. Міне, осы сәні мен салтанаты жарасқан елорда­­­мыздың 17 жылдық мерейлі мерекесін жалпыхалықтық деңгей­де тойлау үрдісі басталып кетті. Астана күні мерекесіне орай қа­ламызды безендіру мен әрлендіру шаралары өріс алды. Астана күніне орай қала көше­леріне ашық түсті гүл аркалары, гүл­ді шарлар және басқа да ме­ре­келік композициялар көптеп орнатылуда. Сонымен қатар, әкімшілік және тұрғын үй ғимараттарының сырты да безендірілді. Аудандарда жарық динамикалық паннолар мен түрлі-түсті жарықшашқыштар орнатылды. Шағын архитектуралық мүсіндер мен пішіндер саябақтар мен шағын бақтардың көркіне көрік қосты. «Есіл» ауданында «Арай» сая­бағын, Ғашықтар саябағын, «Астаналық цирк» шағын бағын, «Астана Опера» мемлекеттік опера және балет театры алдындағы бақтарды безендіру жұмыстары аяқталды. «Хан Шатыр» СОО-ға қара­ма-қарсы жер асты жолына жарықтар қойылып, «Астана Опера» театрының алдындағы көпір мен Орынбор көшесінің бойы және «ҚазМұнайГаз» жаяу жүргіншілер көпірі әсемделді. «I Love Astana» композициялары Есіл өзенінің жағалауында, Астаналық саябақта және Астана халықаралық әуежайы аумағында орнатылды. «Жан жүрегім – Астана» шағын архитектуралық композициялары «Астана Опера» театрының алдында, Тұран даңғылы мен Сыға­нақ көшесінің қиылысында және «Керуен» сауда, ойын-сауық орталығының қасына орналастырылды. «Я люблю Астану» композициялары Сығанақ көшесі мен Бейсекова көшесінің қиылысына қойылды. Сондай-ақ, Астана күніне дайындық шеңберінде аудандарда санитар­лық тазарту, бүлінген абаттандыру құрылғыларын қалпына келтіру, саябақтар мен көшелердегі және сәндік жарықтандыруларды тексеру жұмыстары қолға алынды. «Алматы» ауданында 20-дан астам жарық-динамикалық панно орнатылып, Ш.Құдайбердіұлы даңғылы, Абылай хан даңғылы, Тәуелсіздік даңғылындағы көпірлер мен Қараөткел көпірі, Бараев көшесіндегі көпір безендірілді. 375 панельдік көріністер ілінді. «Сарыарқа» ауданында Рэдис­сон қонақ үйінен Самал шағын ауданына дейін Есіл жаға­лауы­ның ұзына бойына әсем банерлер ілінді. Конгресс-холлдың алды­на «Одуванчик» мерекелік ком­позиция­сы, «Жастар» сарайының алдында «Беседка» инсталляциясы орнатылды. Теміржол вокзалының алдында, Есенберлин мен Бейбіт­шілік көшелері қиылысында және дөңгелек алаңда «Я люблю Астану» шағын архитектуралық композиция­лары көз тартады. Міне, осылай әсем безендірілген елордада биыл Астана күніне орай 70-тен астам мерекелік шара, оның басым бөлігі ашық алаңдарда өткізіледі. Бас қаламыздың төл мерекесін мерейлі өткізейік!