Футбол. Қазақстан Президенті кубогын Испания иемденді

АСТАНА. 27 маусым. Астанада футболдан 17 жасқа дейінгі жасөспірімдер арасында өткен Қазақстан Президентінің Кубогы үшін турнирде Испания жастары жеңімпаз атанды. Олар финалда Әзербайжанды ойын соңындағы пенальти арқылы жеңді. Ал Қазақстан құрамасы қола жүлдеге таласта Грузиядан 1:8 есебімен ойсырай жеңілді. Бұл туралы egemen.kz хабарлады. Финалдық бәсеке аса тартысты өтті. Соған қарамастан, қарсыластар бірінші таймда бір-бірінің осал тұсын таба алмады. Ал кездесудің екінші бөлігінде әзербайжан жастары есеп ашып кетті. Алайда, испандар көп уақыт өтпей жатып таразы басын теңестірді. Қос голдың да авторы команда капитандары екенін айта кетейік. Нәтижесінде турнир жеңімпазы ойын соңындағы пенальти арқылы анықталды. Бұл сында Испания құрамасының бағы басым болып, 4:1 есебімен жеңіске жетті. Осылайша Пиреней түбегінің өкілдері Қазақстан Президентінің Кубогы жарысында чемпиондық атақтарын қорғап қалды. Өткен жылы да осы сайыста Испания топ жарған еді. Жарыстың қола жүлдесі грузиндерге бұйырды. Үшінші орын үшін болған ойында олардың Қазақстанды ірі есеппен жеңгенін жоғарыда айттық. Ал Тәжікстанды 1:0 есебімен жеңген Ресей-2 командасы 5-орын алса, 7-орынға Беларусь құрамасы табан тіреді. Олар бұл орын үшін өткен матчта Қырғызстаннан 3:1 есебімен басым түсті. Еламан Қоңыр. Дерек: egemen.kz. Сурет: presidentcup.kz.