Әйгілі композитор құрметіне

Астана қаласында үстіміздегі жылдың 29 наурызы мен 1 сәуірі аралығында Нұрғиса Тілендиев атындағы «Өз елім» атты IV музыкалық фестиваль өтеді. Әйгілі күйші, дәулескер домбырашы, композитор, дирижер,  Қазақ КСР және КСРО халық әртісі, Халық Қаһарманы Нұрғиса Тілендиев – қазақтың ұлттық өнері мен мәдениетіне өшпес із қалдырған қайраткер. Биылғы жылы 1 сәуірде әйгілі композитордың туғанына 90 жыл толады. Осыған байланысты егемен еліміздің мәдени өмірінде елеулі оқиғалар өткізілмек. Осы кешенді шаралардың бет­ашары ретінде елордада 29 наурыз – 1 сәуір аралығында Нұрғиса Тілендиев атындағы «Өз елім» атты дәстүрлі фестиваль өтеді. Оған Қазақстанның барлық өңірлерінен және Ресейден кәсіби орындаушылар, домбырашылар және дирижерлер қатысады. 16-35 жас аралығындағы талантты өнер саңлақтары қатысатын байқау классикалық вокал (ерлер мен әйелдер), домбыра және дирижерлер сайысы деп бөлінетін 3 аталым бойынша екі айналымда, «Шабыт» және Конгресс-холл сарайларында өткізіледі. Фестивальға қатысушылар Астана қала­сы әкімінің Кубогын сарапқа салады.  Сонымен бірге, жарыс жеңімпазына гран-при және екінші, үшінші орындарды алған жүлдегерлерге «Фестиваль лауреаты» атақтары беріледі. Айтулы музыка мерекесі 1 сәуір күні Конгресс-холл сарайында өтетін гала-концертке ұласады. Оған Бибігүл Төлегенова, Алтынбек Қоразбаев, Нұрғали Нүсіпжанов және басқа өнер саңлақтары қатысады. «Егемен-ақпарат».