Жалғыз өзі олжа салған

Мұның алдында халық­аралық дәрежедегі спорт ше­бері Ирина Эктованың үш қарғып секіруден 2016 жылы Рио-де-Жанейро қаласында өтетін Олимпиада ойындарына жолдама жеңіп алғаны, іле-шала Дариға Шәкімованың бокстан Азия чемпионы атанғаны солтүстікқазақстандықтарды қуантса, Аманғали Бекбо­латовтың табысы мерейлерін тіпті асырды. Сөз арасында командаластар арасында Дариғаның жалғыз алтын сыйлағанын, ал Аманғалидың ел құрамасына жүлде тарту еткен дара саңлақ екенін ескерсек, үшінші орынға табан тіреуін ғажайып жеңіске балаған болар едік. Сол себепті Бразилияда ұйымдастырылған жастар арасындағы грек-рим күресінен әлем біріншілігінің жүлдесін қанжығаға өңгеріп әкелген оны қарсы алу үшін облыс әкімінің бірінші орынбасары Айдарбек Сапаров теміржол вокзалына арнайы барып, жас балуанның қолын қысты. Аймақ басшысы Ерік Сұлтановтың жүрекжарды құттықтауын жеткізді. Туған-туыстары мен спортсүйер қауым гүл шоқтарын ұсынып, үлкен қошемет көрсетті. Аманғали – грек-рим күресінен Қазақстанның үш дүркін чемпионы. Бүгінде М.Қозыбаев атындағы Солтүстік Қазақстан мемлекеттік университетінде оқиды. – Әлем біріншілігіне баратын спортшыларға бөлінген қаражаттың шектеулігінен Аманғалидың додалы бәсекеге қатысу-қатыспауы екіталай еді. Облыс әкімінің тікелей қолдауы арқасында қажетті қаржы табылып, енді, міне, мыңдаған жанкүйерлердің сенімін ақтай білді. 58 елден келген 200 спортшы арасынан маңдайы жарқырап, ел құрамасына жалғыз жүлде әперуін қалай әспеттесек те жарасады, – дейді облыстық денешынықтыру және спорт басқармасының басшысы Руслан Есеналин. Ол осыдан үш жыл бұрын Болгарияда олжа салған жерлесі Ақан Баймағанбетовтің жеткен жетістігін, алған асуын бағындырды. Өмір ЕСҚАЛИ, «Егемен Қазақстан». Солтүстік Қазақстан облысы.