Солтүстік Қазақстан сот төрағалары мен судьялары таныстырылды

ПЕТРОПАВЛ. 2 наурыз. Солтүстік Қазақстан облыстық сотының төрағасы Мұратғали Әкетай Президенттің 2015 жылдың 18 ақпанындағы Жарлығымен тағайындалған сот төрағалары мен судьяларды ұжымға таныстырды. Шараға қала әкімі Марат Тасмағанбетов қатысты. Бұл туралы облыстық соттың баспасөз қызметі хабарлады. Қылмыстық істер бойынша мамандандырылған ауданаралық соттың төрағасы қызметін Сергей Викторенко атқарады. Ол бұған дейін Шал ақын ауданында судья болып істеген. Петропавл қалалық №2 сотының төрайымы болып Динара Байзакова тағайындалды. Ол осында көп жыл судья міндетін атқарып келген. Ал Күлнар Мәсімова, Гүлнар Шайкенова, Арай Әбілмәжінова, Ирина Есіргепова Мамлют, Аққайың аудандық, Петропавл қаласы №2 сотының судьялары қызметіне кірісті. Мұратғали Абрарұлы жаңа тағайындалған сот төрағалары мен судьяларға табыс тілей отырып, Конституцияға және заңнамаларға сәйкес әділ шешім қабылдау бұлжымас міндет болып табылатынын атап көрсетті. Өмір Есқали. Дерек, сурет: Солтүстік Қазақстан облыстық сотының баспасөз орталығы.