Салықшылар сәбилерге ертегі сыйлады

  Көкшетау қаласының «Алтын бала» балабақшасында, Ақмола облысы бойынша мемлекеттік кірістер департаментінің қызметкерлері «Салық төлегісі келмеген сараң Хасан туралы ертегі» кітабын таныстырды. Департаменттің мемлекеттік қызметтер басқармасының басшысы Назгүл Аюпова сәбилерге сый-сауғалар үлестіріп, тақпақ айту мен ән жарысын ұйымдастырды. Балалармен сұхбат барысында олардың туған ел, достық, жануарлар әлеміне қатыс­ты пікірлері бейнетаспаға жазып алынды. Мұндағы әртүрлі ойындардың өзі танымдық мазмұнға құрылады екен. Сондай-ақ, бала­бақша тәрбиеленушілерінің бола­шаққа қатысты ой-өрістерінің кеңдігі тәнті етті. Содан болса керек, «салықтық мәдениет балалық шақта қалыптасады, сондықтан біз өскелен ұрпақпен жұмыс жасауға әрдайым көңіл бөлетін боламыз», – дейді жүзі бал-бұл жанған Назгүл. Таныстыру кезінде департаменттің бас мамандары Елнар Қазбеков пен Динара Ешімтаева болашақ 18 салық төлеушінің әқайсысына бір-бір данадан ертегі кітабын табыс етті. Мектепке дейінгі мекеменің дирек­торы Гүлжан Ержанова айт­қандай, жаңа мемлекеттік орган­ның балаларға қонақ болып, ерекше көңіл бөлуі қуантарлық, себебі, осы сәби шақта баланың сана сезімі дамып, тұлға ретінде қалыптасады және тәртіптік әдепке ұмтылыстары көрініс табады. Осы ретте, мемлекеттік кірістер департаменті жаңа оқу жылында мектеп табалдырығын алғаш рет аттайтын қаладағы барлық бүлдіршіндерге «Салық дегеніміз не және оның қажет­тілігі» атты кітабын сыйға тар­туды жоспарлап отырғанын айта кет­­кіміз келеді. Бақберген АМАЛБЕК, «Егемен Қазақстан». КӨКШЕТАУ.