Меркель Қазақстанды таңдады

АСТАНА. 2 наурыз. Қазақстан футбол құрамасына тағы бір неміс футболшысы қосылды. Ол – Александр Меркель. Бұл туралы kff.kz хабарлады. Александр Меркель 1992 жылы 22 ақпанда Алматы қаласында дүниеге келген. Алты жасында отбасымен бірге Германияға көшіп барып, жергілікті «Вестарвальд» командасы сапында спорттың қыр-сырын үйренді. Кейін «Штутгарт» футбол академиясында тәлім алды. 16 жасында Италияның «Милан» командасына ауысып, үш жыл сол жерде өнер көрсетті. Тіпті команданың негізгі құрамында ойнауға мүмкіндік алды. Артынан «А» сериясында ойнайтын «Дженоа» және «Удинезе» командаларының сапында доп тепті. Өткен жылы аз уақыт Англияның «Уотфорд» командасының намысын қорғады. Ал бүгінде Швейцарияның «Грассхоппер» командасында ойнайды. Айта кетейік, осыған дейін тағы екі неміс футболшысы Қазақстан ұлттық құрамасын таңдаған болатын. Яғни, Қазақстанда дүниеге келіп, кейін тарихи Отандарына көшіп кеткен Гейнрих Шмитдгаль мен Константин Энгель де футбол әліппесін Германияда үйренген ойыншылар. Еламан Қоңыр. Дерек: kff.kz. Сурет: eurosport.ru.