Сауда министрімен салиқалы әңгіме

Астанада Қазақстан Республикасының Сыртқы істер министрі Ерлан Ыдырысов Сауд Арабиясы Корольдігінің Сауда және индус­трия министрі Тауфик ар-Рабиамен кездесу өткізді, деп хабарлады Сыртқы істер министрлігінің баспасөз қызметі. Тараптар екіжақты қатынастар мен халықаралық күн тәртібінің кең ауқымды мәселелерін талқылады. Сұхбаттастар сауда-экономикалық, ядролық және жаңғыртылмалы энергетика, мұнай химиясы, көлік салаларында екіжақты байланыстарды дамытуға және инвестициялық ынтымақтастықты белсенділендіруге мүдделілігін білдірді. Е.Ыдырысов Сауд Арабиясының Араб мемлекеттер лига­сы­ның, Ор­талық Азия елдері мен Әзер­бай­жанның экономи­калық форумын өткізу бастамасын жоғары бағалап, өңірлер ара­сындағы сауда-экономикалық байланыстарды одан әрі нығай­тудағы бұл шараның зор маңызын атап өтті. Сұхбаттастар Кәсіп­керлер кеңесінің бірлескен жұмысын қайта жаңғырту қажет­тілігін растап, екіжақты кеңес отырысын биыл өткізуге келісті. Е.Ыдырысов Қазақстан Сауд Арабиясын араб және мұсыл­ман әлемінде маңызды серіктес ретінде қарастыратынын атап өтті. «Қазақстан мен Сауд Арабия­сының халықаралық және өңір­лік өзекті мәселелер бойынша ұстанымдары ортақ немесе ұқсас. Жаһандық қауіпсіздікті нығайтуға, лаңкестікпен күресу­ге, өркениеттер үнқатысуы үрдісін дамытуға бағытталған екі ел бас­тамалары әрқашан да үндес келеді», – деп мәлімдеді   Е.Ыды­рысов. Екі мемлекет тарапынан қарусыздану, қауіпсіздікті нығайту, өркениеттер үнқатысуы және т.б. мәселелер бойынша БҰҰ және өзге халықаралық, өңірлік ұйымдар шеңберінде тығыз ықпалдасуға мүдделілік білдірілді. Е.Ыдырысов Қазақстан Прези­ден­тінің Әлемдік және дәстүрлі діндер көшбасшыларының съезін ша­қыру жөніндегі бастамасын, 2017-2018 жылдары БҰҰ Қауіпсіздік Кеңесінің тұрақты емес мүшелігіне кандидатурасын және Астанада халықаралық мамандандырылған ЭКСПО-2017 көрмесін қолдағаны үшін Сауд Арабиясына алғысын білдірді. «Егемен-ақпарат».