Облыстық Қазақстан халқы Ассамблеясының ХХ сессиясы жұмысына Қазақстан халқы Ассамблеясы Төрағасының орынбасары – Хатшылық меңгерушісі Ералы Тоғжанов қатысып, ел тұрақтылығын қамтамасыз етудегі саяси құрылымның рөліне Елбасының жоғары баға бергенін атап өтті.
Барлық деңгейдегі этномәдени бірлестіктер жетекшілері, діни конфессия өкілдері, мемлекеттік орган басшылары алдында облыстық Ассамблеяның төрағасы, аймақ басшысы Ерік Сұлтанов баяндама жасап, Қазақстан халқы Ассамблеясының Төрағасы Нұрсұлтан Назарбаевтың «Мәңгілік Ел: бір ел–бір тағдыр» тақырыбында Қазақстан халқы Ассамблеясының 20 жылдық мерейтойына арналған ХХІІ сессиясында сөйлеген сөзінен туындайтын міндеттерге жан-жақты тоқталды. Ел егемендігін алған күннен бастап Президент тұрақтылықтың негізі етіп халықтың татулығын қойды. Осы жылдары құрылған Қазақстан халқы Ассамблеясы қоғамдық келісім мен бірлік институтына айналды. Этносаралық татулықтың арқасында елімізде экономикалық, әлеуметтік-саяси бағдарламалар табысты жүзеге асырылып келеді. Алдымызда 5 халықтық реформаны орындау сияқты келелі міндеттер тұр, дей келіп, шешен жергілікті жерлерде атқарылып жатқан іс-шаралармен таныстырды.
Қазақстан халқы Ассамблеясы Төрағасының орынбасары – Хатшылық меңгерушісі Е.Тоғжанов Мәңгілік Ел идеясы арқауына негіз болған құндылықтарымызды өскелең ұрпақ бойына дарыту мәселесіне айрықша көңіл бөлді. Елбасының бастамалары мен тапсырмалары Қызылжар өңірінде ойдағыдай орындалатынына сенім білдірді.
Бұдан кейін ел бірлігін нығайтуға, мәдениетаралық үнқатысуды дамытуға және қазақстандық патриотизмді қалыптастыруға елеулі үлес қосқан бір топ солтүстікқазақстандыққа «Қазақстан халқы Ассамблеясының қоғамдық «Бірлік» алтын белгісі» мен «Қазақстан халқы Ассамблеясына – 20 жыл» мерекелік медалін салтанатты жағдайда табыс етті.
Этномәдени бірлестіктер облыс әкімінің арнайы гранттарына ие болды.
Облыстық Ассамблея төрағасының орынбасары болып «Лад» славян қоғамының жетекшісі Александр Курленя сайланды.
Өмір ЕСҚАЛИ,
«Егемен Қазақстан».
Солтүстік Қазақстан облысы.
