Президенттікке алғаш ұсынылғандар тізімі жарияланды

АСТАНА. 4 ақпан. Орталық сайлау комиссиясы Қазақстан Президенті болуға үміткерлікке өзін-өзі ұсынушылардың алғашқы легінің аты-жөнін жария етті. Бұл туралы Tengrinews.kz тілшісі хабарлады. «2 наурыз күні Орталық сайлау комиссиясына өз кандидатурасын өзін-өзі ұсыну тәртібі бойынша Асқар Жорабайұлы Сырғабаев арыз берді. 3 наурыз күні тағы да өзін-өзі ұсыну тәртібімен өз кандидатураларын Сафиолла Қалабайұлы Алдажанов, Лимана Қойшиева, Бақыт Төлегенұлы Әбдікәрімов және Сухраб Әминжанұлы Мырзашов ұсынды», - делінген ОСК таратқан хабарламада. Комиссияның мәліметінше, қазірге дейін бес талапкер ұсынылып отыр, оның біреуі - әйел. «Қазақстан Республикасындағы сайлау туралы» Конституциялық заңның 54-бабы 2-тармағына сәйкес, президенттікке үміткерлерді сәйкестендіруді және оған Конституциямен және Қазақстан Республикасындағы сайлау туралы» Конституциялық заң қоятын талаптарды Орталық сайлау комиссиясы өзін-өзі ұсыну туралы арыз берілген сәттен бес күн ішінде бекітеді», - делінген баспасөз парағында. Еске сала кетейік, 26 ақпан күні Орталық сайлау комиссиясы бекіткен күнтізбелік жоспарға сәйкес Қазақстан Президентінің кезектен тыс сайлауына үміткерлерді ұсыну басталған болатын. Сайлау 2015 жылғы 26 сәуірге белгіленіп отыр. Сәкен Майлыбай.