Уақыт талабы туындатқан міндеттер

Кеше Премьер-Министр Кәрім Мәсімовтің төрағалығымен Үкіметте селекторлық кеңес өтті. Онда Үкімет басшысы жаңа ақша-несие саясатына көшу туралы мәлімдеді. Премьер-Министр Кәрім Мә­сі­мов Қазақстанда инфляция­лық таргеттеуге негізделген және ұлттық валютаның айырбас бағамын еркіндікке жіберуді қарастыратын жаңа ақша-несие саясаты енгізі­летінін хабарлады. Үкімет бас­шысының мәлімдеуінше, әлемдік экономикадағы қазіргі жағдай бізге де экономикалық өсім мен баға тұрақтылығы арасындағы теңгерімді қамтамасыз ету үшін жаңа ақша-несие саясатын қабылдауды  талап етіп отыр. Осыған орай Ұлттық банк пен Үкімет 2015 жылдың 20 тамызынан бастап валюталық дәлізді алып тастауға және айырбас бағамын еркіндікке жіберуге көшуге негізделген жаңа ақша-несие саясатын жүзеге асыруға кірісу жөнінде шешім қабылдады. «Ағымдағы жылдың 15 тамызында Ұлттық банк валюта бағамының дәлізін кеңейту мақсатымен теңгенің айырбас бағамының еркін нарықта қалыптасуын қамтамасыз етуге қатысты шешім қабылдаған болатын. Бұл өз кезегінде біздің экономикамызға өз әсерін тигізбей қоймайтыны белгілі. Оның үстіне жаһандық экономикадағы жағдай уақыт өткен сайын тұрақсыз­да­нып келеді», деді К.Мәсімов. Сонымен қатар, Үкімет басшысы біздің экономикамыздың негізгі тірегі болып саналатын экспорттық өнімдерімізге қатысты нарық бағаларының да құлдырап жатқандығын атап өтті. Қазақстанның негізгі экспорттайтын өнімдері мұнай мен металл сынды шикізаттық тауарларға да сұраныс төмендеп, баға түсіп жатқаны белгілі. Бұл біздің ІЖӨ-нің көлемінің азаюына әкеп соғады және ол ішкі экономикамызды әлсіретуі де мүмкін. Сондықтан да біз­дің экономикалық саясатымыз ең алдымен әлеуметтік-эко­номикалық тұрақтылыққа негізделуі керек,  деді ол. Сондай-ақ, Үкімет басшысы отандық өнім өндірушілерді тұралатып алмау мақсатында және кредиттік белсенділік пен инвестициялық тартымды­­лықты бәсеңдетпеу арқылы жұмыссыздықтың алдын алу жайына жан-жақты сараптама жасау керектігін де ескертті. Үкімет басшысы осы сәттен бастап теңгенің айырбас бағамы нарық сұранысы негізін­де және іргелі ішкі және сыртқы мак­роэкономикалық фактор­ларды ескере отырып қалып­тасты­рылатынын айтып өтті. «Бұл айырбас бағамы әлсі­­­реуге қарай, сондай-ақ, нығаю­ға қарай өзгеруі мүмкін екен­дігін білдіреді, оны әлем эконо­микасындағы және ішкі валюта нарығындағы жағдай анықтайды», деді Премьер-Министр. Ол сондай-ақ, Ұлттық банк теңгенің айырбас бағамы деңгейін қалыптастыруға араласпайтынын, алайда елдің қаржылық жүйесінің тұрақсыздану қаупі туындаған жағдайда валюталық интервенция жүргізу арқылы ішкі валюта нарығына қатысу мүмкіншілігін өзіне қалдыратынын айтты. Мемлекет тарапының араласуынсыз нарық сұранысы мен ұсыныс негізінде айырбас баға­мын қалыптастыру экономика өсімінің сауығуына, несие және инвестициялық белсенділіктің артуына, жаңа жұмыс орындарының құрылуына, орта мерзімді бола­шақта инфля­цияны 3-4 пайыз­ға дейін төмендетуге қажетті алғышарт құрады. К.Мәсімов айтып өткендей, инфляциялық таргеттеу режі­міне негізделген жаңа ақша-несие саясатын жүзеге асыру эко­­номикалық саясаттың страте­гиялық міндет­терін – отандық эконо­миканың ұзақ мерзімді тұрақты өсіміне қол жеткізуге, инфля­цияның төмен деңгейін сақтауға, жұмыспен қамту деңгейін артты­руға және ел халқының әл-ауқатын жақсартуға жәрдемесетін болады. Премьер-Министр сөзінің қорытындысында теңге ба­ға­мы­ның еркін жіберілуіне байланыс­ты бағаның негізсіз көтерілуіне жол бермеуді тапсырды. «Өңір әкімдері штабтарға басшылық жасап, жергілікті бюджеттен қаржыландырылатын атаулы әлеуметтік және тұрғын үй көмектерінің деңгейін арттыру арқылы халықтың әлеуметтік аз қамтылған тобына қолдау шараларын қабылдауы тиіс. Сонымен қатар, бағаның, әсіресе, әлеуметтік маңызы бар азық-түліктер мен қызметтер бағаларының негізсіз өсіміне жол бермеу бойынша ұйымдастыру шараларын қабылдауды тапсырамын»,  деді Үкімет басшысы. К.Мәсімов сонымен қатар, жедел шараларды жалпы үйлестіруді өзінің бірінші орынбасары Бақытжан Сағынтаевқа, ал әлеуметтік мәселелерді орынбасары Бердібек Сапарбаевқа жүктеді. Премьер-Министрдің мәлім етуінше, сенбі күні Үкімет отырысы өтіп, онда құрылымдық реформалар топтамасы, жедел шаралар, бюджеттік сипаттағы мәселелер және одан арғы макро­экономикалық саясат талқы­ланатын болады. Динара БІТІКОВА, «Егемен Қазақстан».