Атыраудағы ыстық +47 градусқа жетті

АТЫРАУ. 30 маусым. Атыраудағы аптап ыстықтың беті қайтар емес. Кеше көшедегі ауа температурасының +47 градусқа жеткені тіркелді. Бұл туралы egemen.kz тілшісі хабарлады. Соңғы бір аптадан бері Атыраудың көшелерінде жүру мүмкін емес. Өйткені, аптап ыстықтың лебі күйдіріп тұр. Көшедегі ыстық +40 градустан жоғары. Осыған орай төтенше жағдайлар департаменті ескерту жасап отыр. Мәселен, дүйсенбіде фотографтар обьективіне көшедегі ыстықтың әсерінен термометрдің сынап бағанасы +47 градусқа көтерілгені ілінді. Осындай ыстық бүгін де сақталып, +40 градустан асып тұр. Төтенше жағдайлар департаментінің мамандары шілденің алғашқы он күндігінде ыстықтың аздап төмендейтініне болжам жасап отыр. Нақтылай  айтқанда, +34-39 градус шамасында болады. Ал екінші онкүндікте аптап тағы да +40 градустан жоғарылайтыны күтілуде. Жолдасбек Шөпеғұл. Дерек: egemen.kz. Сурет: Рахым Қойлыбаев.