Мүгедек жандар мемлекет қамқорлығында

 

Мәжіліс депутаты, «Нұр Отан» партиясының мүшесі Ольга Киколенко басқаратын «Жұмыспен қамту және халық табысы» бағыты бойынша сарапшылар тобының отырысы өтті. Оған Мәжіліс пен мәслихаттардың депутаттары, Денсаулық сақтау және әлеуметтік даму, Ұлттық экономика министрліктерінің, «Ауыл шаруашылығын қаржылай қолдау қоры» АҚ-тың, үкіметтік емес ұйымдардың өкілдері қатысты.

Аталған сарапшылар тобының отырысында «Кедергісіз келешек» пар­тия­лық жобасы шеңберінде мүмкіндігі шек­теулі жандарды жұмысқа орналас­ты­рудың тиімділігі, сонымен қатар, «Ауыл шаруашылығын қаржылай қолдау қоры» АҚ жүйесі бойынша шағын несиелендіру мәселелері талқыланды. Жиында белгілі болғандай, қазіргі таңда елімізде 626,7 мыңнан астам мүгедек жан бар. Олардың ішінде 64,5 пайызы еңбек етуге қабілетті жаста болса, денсаулық жағдайы бойынша жұмысқа жарамдылары 16 пайызды құрап отырған көрінеді. Ал 20 пайызы (82,6 мың адам) жұмысқа орналасқан. Денсаулық сақтау және әлеуметтік даму вице-министрі Светлана Жақыпованың сөзіне қарағанда, 2015 жылдың І тоқсанының қорытындысы бойынша, мүмкіндігі шектеулі 2,3 мыңнан астам жанды жұмыспен қамту мақсатында көптеген шаралар жүзеге асырылған. Оның айтуынша, 967 азамат қоғамдық жұмыстарға бағытталған, 430 адам еңбек етер орнын мемлекеттік қолдау шараларының көмегінсіз тапқан, ал 322-сі әлеуметтік жұмыс орындарына жіберілген. Cондай-ақ, басқосу барысында арнайы жұмыс орнын ашқандарға субсидия беру, мүгедектерді кәсіпорынның штаттық санына байланысты жұмысқа орналастыру бағытында квота беру тетігін жетілдіру бойынша нормалар қарастырылған кейбір заңнамалық актілерге енгізілген түзетулер Мәжілісте талқыланып жатқаны айтылды. Бұдан бөлек, аталған нормаларды іске асыру үшін заңға қосымша тиісті актілер дайындалу үстінде екені сөз болды. Өз кезегінде депутат Ольга Кико­ленко: «Қазіргі экономикалық шарттар мен еңбек нарығындағы жағдай шең­берінде мүгедектердің құқықтарын қорғау мақсатында бекітілген конвен­цияның талаптарын орындауымыз қажет. Бұл талап – мүгедектердің жұ­мысқа орналасуына жәрдемдесу», деді. Отырыста халықты жұмыспен қам­тудың тиімді тетіктерінің бірі – ша­ғын несиелендіру екеніне баса назар аударылды. Бүгінде «Жұ­мыс­пен қамту-2020» мемлекеттік бағдар­ла­масының аясында 28,7 мың жан несие алыпты. Олардың ішінде 20 мыңы өз ісін ашса, 8,6 мыңы бизнестерінің көлемін кеңейткен. Осы арада аталған бағдарлама шеңберінде 30 мыңнан астам азамат кәсіпкерлік негіздері бо­йынша білім алғандарын да айта кетейік. Жолдыбай БАЗАР, «Егемен Қазақстан».