Жеңіл атлетика. Ольга Рыпакова – әлем чемпионатының қола жүлдегері!

АСТАНА. 25 тамыз. Қытай астанасы – Бейжің қаласында өткізіліп жатқан жеңіл атлетикадан әлем чемпионатында отандасымыз, Лондон Олимпиадасының чемпионы Ольга Рыпакова үш қарғып секіру сайысы бойынша қола жүлдегер атанды. Ол соңғы мүмкіндігінде 14,77 метрге секіріп, басты бәсекелесі болгар Габриела Петровадан 11 сантиметрге артық нәтиже тіркеді. Бұл туралы egemen.kz хабарлады. Сайыстың жеңімпазы ретінде колумбиялық Катрин Ибаргуэн атанды. Оның көрсеткіші 14,90 метр. Ал күміс жүлде Израильден келген Анна Князова-Миненкоға бұйырды (14,78 метр). Рыпакова әлем чемпионатындағы бұл жүлде Рио-де-Жанейро Олимпиадасы қарсаңында өзіне деген сенімділікті күшейтіп, жігерін арттыратынын айтты. «Биылғы маусымға дайындық көңілдегідей болмады. Оған жарақаттарым себеп болды. Сондықтан Бейжіңде 14,77 метрді бағындырамын деп мүлдем ойлаған жоқпын. Бұл көрсеткіш келесі жылғы Олимпиадада жоғары нәтижеге қол жеткізу үшін күш беретінін айтқым келеді», – деді Ольга Ресейдің ақпарат құралдарына берген сұхбатында. Айта кетейік, Бейжіңдегі әлем чемпионаты 30 тамызда аяқталады. Еламан Қоңыр. Дерек: egemen.kz. Сурет: yvision.kz.