Алматы облысының Талғар ауданындағы Бесағаш ауылында 600 орындық жаңа мектеп биылғы оқу жылында шәкірттерге есігін айқара ашты. Бұл білім ұясының ашылу салтанатына Алматы облысының әкімі Амандық Баталов пен Қазақстан Республикасы Білім және ғылым министрі Аслан Сәрінжіпов қатысты.
«Нұрлы Жол» мемлекеттік бағдарламасы аясында бой көтеріп, алды халық игілігіне ұсынылып жатқан мектептердің ел келешегіне қосар үлесі орасан екендігін жеткізген облыс әкімі Амандық Баталов аудан халқына жаңа білім ғимаратының игілігін татып, тәрбиелі ұрпақтың қызықшылығын көрулерін, білім беру ісінде еңбек етуші ұстаздар қауымына атқарар қызметтері жемісті болуын тіледі.
– Алматы облысы демографиялық өсім жөнінен қарқынды нәтиже көрсетіп келе жатқан аймақ. Өйткені, мұнда өзге өңірлерден көшіп келушілер саны өте көп. Биыл осы өңірдің өзінде 18 жаңа мектеп ашылып, облыс аумағындағы халқы ең тығыз орналасқан елді мекендердегі жастарымыздың білім алуына көптеген жеңілдіктер жасалынбақ. Осындай жаңа мектептер ашу арқылы біз үш ауысымды мектептер мен апатты жағдайдағы білім ордаларының мәселесін түбегейлі шешетін боламыз, – деді Білім және ғылым министрі Аслан Сәрінжіпов.
Бесағаштықтардың қуанышын бөлісуге келген Парламент Мәжілісінің депутаты Әлихан Тойбаев, Талғар ауданының әкімі Райхан Садықова жаңа мектептен түлеп ұшатын жас буын өкілдері оқуда озат болатындарына сенім білдірісті.
Бесағаш ауылындағы №45 мектеп гимназиясының құрылыс жұмысы 2014 жылы басталып, республикалық және жергілікті бюджеттен 1 миллиард 187 миллион теңге қаржылай қолдауға ие болған еді. «Альтаир» ЖШС бас мердігер болып, діттеген уақытында тапсырылған құрылыстың жалпы көлемі 3060 шаршы метр.
Жаңа мектепте 45 оқу кабинеті, 3 шеберхана, 1 мультимедиялық кабинет, жаңа үлгідегі химия, физика, биология және информатика кабинеттері, 575 шаршы метрлік спорт залы, 200 орындық асхана және медициналық бөлмесі бар. Бұдан өзге, кітап қорында 3000 әдеби және 6000 оқулықпен қамтылған кітапхана мен оқу залы, оқушы қыздар үшін тігін, ал ұлдар үшін ағаш пен металл өңдейтін цехтар бар. Еңбек сабағын өткізу үшін барлық құрал-сайман мен керекті жабдықтар толық жетерлік.
Әзірге 60 мұғалім қызмет атқарғалы отырған жаңа мектептің ашылу салтанатына ауыл тұрғындары ерекше көңіл-күймен қатысып, ақсақалдар жастарға бата беріп, жаңа білім жолында үлгілі болуларына тілек қосты.
Қалықтаған шаттықтың қанатында ән,
Қуаныштың жырынан дала тұнған.
Мектебіміз жарандар құтты болсын,
Бесағаштың төрінен жаңа ашылған!
– деп Арман Әділғазы есімді шәкірт жыр арнап, өнерпаз оқушылар ән-биден шашу шашты.
Қанат ЕСКЕНДІР,
«Егемен Қазақстан».
Алматы облысы.
Суреттерді түсірген
Жұмабай МҰСАБЕКОВ.
