Бангладеште қарақшылар қолынан атеист-блогер қаза болды

АСТАНА. 1 сәуір. Бангладеште ислам фундаментализмі мен олардың өмір сүру дағдысын сынға алып жүрген 27 жастағы тәуелсіз журналист, блогер Вашкур Рахман Бабу өлтірілді. Бұл туралы euronews.com хабарлады. Оны екі күдікті бірнеше күн ізіне түсіп аңдып, ұрымтал тұста пышақпен бауыздап кеткен. Полицейлер қылмыскерді жедел іздестіру барысында екі адамды қолға түсірді. Екеуі де медреседе білім алған. Олар журналистің ислам дініне қарсы жариялаған ақпаратына кектенген. Естеріңізге сала кетейік, осыдан бір ай бұрын Бангладеште Авиджит Роя есімді блогер қарақшылардың қолынан өлген болатын. Ол да ислам дінін сынға алып, өзін атеист санаған еді. Ал дәл осыған ұқсас оқиға 2013 жылы да тіркелген-ді. Онда атеист-блогер Ахмеда Раджида Хайдера қаза болған. Блогердің өлімінен соң халық арасында үлкен толқу орын алған-ды. Наразы топ екіге бөлініп, бірі зайырлы қоғамды қаласа, енді бірі ислан дінінің наным-сеніміне нұқсан келтіргендерді қатаң жазалау керек деген болатын. Талғат Райымбек. Дерек, сурет; euronews.com.