Маңғыстауда ел аумағын заңсыз кесіп өткен браконьерлер ұсталды

АҚТАУ. 1 сәуір. Маңғыстауда теңіздегі Қазақстан аумағын заңсыз кесіп өтіп, балық аулаған шетелдік браконьерлер ұсталды. Бұл туралы tumba. kz хабарлады. «Тараз» шекара кемесіне мінген «Жағалау күзеті» аймақтық басқармасының шекарашылары кезекті рейд жүргізді. Рейд барысында Каспий теңізін заңсыз кесіп өтіп, Қазақстан аумағынан балық аулаған браконьерлерді байқаған. Заң бұзушылар біздің шекарашыларды көрісімен, қайықтарының жылдамдықтарын арттырып, оқиға орнынан бой тасалауға тырысты. Қазақстан шекарасынан шығып кетуді ойлаған браконьерлерге шекарашылар ескерту оғын атуға мәжбүр болған. Аспанға екі рет атылған ескерту оғынан соң, Әзербайжанның 4 азаматы қолға түсті. Оларды тінту барысында, «Байда» жеңіл қайығы, 28 тыйым салынған балық аулау құралдары және жалпы салмағы 946 кг. құрайтын 240 дана бекіре тәркіленді. Қазіргі таңда браконьерлерге қатысты мемлекеттік шекараны бұзу және браконьерлік баптары бойынша қылмыстық іс қозғалып, тергеу амалдары жүруде. Қолға түскен Әзербайжан азаматтары Ақтау қаласындағы уақытша тергеу изоляторына қамалды. Гүлайым Шынтемірқызы. Дерек, сурет: tumba. kz.