Атырауда сайлауды бақылаушы қоғамдық комиссия жұмысын бастады

АТЫРАУ. 1 сәуір. Атырауда Президент сайлауын бақылау жөніндегі қоғамдық комиссияның өңірлік филиалы жұмысын бастады. Бұл туралы egemen.kz тілшісі хабарлады. Қазір облыстық филиалда еріктілерден байқаушылар құрамын жасақтау жұмысы жүргізіліп жатыр. Өңірдегі 232 сайлау учаскесін байқаушылармен қамтамасыз ету мақсатында еріктілерді іріктеу жалғасуда. Қазірдің өзінде 190-ға жуық ерікті байқаушы тіркелді. Олардың қатарында жоғары және орта арнаулы оқу орындарының студенттері мен магистранттар, мұғалімдер мен зиялы қауым өкілдері бар. Осы аптаның соңына дейін еріктілерден байқаушылардың құрамын жасақтау аяқталады. «Біздің мақсатымыз – сайлаудың еркін және әділ өтуін бақылау, сонымен бірге, сайлау барысында заңдылықтың сақталуын бақылаумен бірге азаматтардың сайлау құқығын қорғау. Жақын арада жеті ауданда және облыс орталығында ерікті бақылаушылар үшін сайлау туралы заңдылықты түсіндіруге арналған семинар-тренингтер өткізуді жоспарлап отырмыз. Байқаушыларды арналған әдістемелік құралдармен таныстырамыз», дейді «ҚР сайлауды бақылау жөніндегі республикалық қоғамдық комиссия» республикалық қоғамдық бірлестігінің Атырау облысындағы филиал төрайымы Шынаргүл Қайырова. Жолдасбек Шөпеғұл. Дерек: egemen.kz. Сурет: Рахым Қойлыбаев.