Атырау тұрғыны жалған тоналу туралы шағым түсірді

АТЫРАУ. 1 сәуір. Атырау тұрғыны полицияға көшеде тоналғаны жөнінде жалған шағым түсіргенін мойындады. Бұл туралы облыстық ішкі істер департаментінің баспасөз қызметі хабарлады. Қаланың Привокзальный-5 шағын ауданында тұратын 35 жастағы тұрғынның тоналғаны туралы шағымы расталмады. Атырау облыстық ішкі істер департаментінің баспасөз хатшысы Гүлназира Мұхтарованың мәліметінше, шағымданушыға түн қараңғылығында белгісіз үшеу шабуыл жасап, 150 мың теңгесін тартып алған. Сол сәтте «жәбірленуші» кафеден шыққан екен. Полиция жедел іздестіру шараларына кіріскен кезде арызданушы бастапқы айтқанынан айнып, шындықтың бетін ашты. Шындығында, ол ақшасын арақ ішуге жұмсап, отбасылық кикілжіңнің алдын алу үшін осындай қадамға барған Тіпті сол үшін өзінің бетін жарақаттағанын да мойындап отыр. Енді оған Қылмыстық Кодекстің 419-бабының 2-тармағы бойынша (қылмыс жасалғаны туралы көрiнеу жалған сөз жеткiзу) қылмыстық іс қозғалды. Жолдасбек Шөпеғұл. Дерек: Атырау облыстық ішкі істер департаментінің баспасөз қызметі. Сурет: mhealth.ru.