Қызылордада шыны кәсіпорнының құрылысы басталды

Қызылордада шыны шыға­ратын зауыт салынады дегелі біраз уақыт болған еді. Тұтас аймақ үшін ғана емес, республикаға зор пайда әкелетін жобаның құрылысын тағатсыздана күт­кендер көп. Дегенмен, әртүрлі жағдайларға байланысты осы бір алып құрылыстың басталуы кейінге шегеріле берді. «Сабақты ине сәтімен» дейді ғой дана халқымыз. Сол айтқандай, шыны зауытының құрылысы биыл басталды. Бұл не жоба? Қандай пайдасы бар? Енді аз-кем осы жайына тоқтала кетелік. Зауыт іске қосылғанда табақша шынылар шығара бастайды. Оның өнімі әртүрлі болмақ. Тіпті, ұялы телефонның бетіне қойылатын шыныға дейін шығара алады. Неміс технологиясымен салынатын зауыт барлық заманауи құрал-жабдықтармен қамтылмақ. Зауыттың бір күндік қуаттылығы 600 тонна шыны шығаруға жетеді. Яғни, бұл – жылына 197 100 тонна табақша шыны шығады деген сөз. Зауыт құрылысын іске асыратын стратегиялық инвес­тор ретінде АҚШ-тың «Steward Engineers» компаниясы таңдап алынған. Аталған компания «Қа­зақстанның инвестициялық қоры­мен» бірігіп құрылыстың 20 пайызын қаржыландырып отыр. Ал қалған қаражатты «Қазақстанның Даму банкі» өтейді. Жобаның жалпы құны – 52,1 миллиард теңге. Шыны зауытының құрылысы үшін Қызылорда қаласындағы индустриалды аймақтан 50 гектар жер бөлінді. Облыс бюджетінен онда инфрақұрылымдық жұ­мыс­тар жүргізілді. Айталық, газ, су желісі, телефон сымдары, автомобиль жолдары мен кәріз жүйелері толықтай жасалды. Техникалық-экономикалық не­гіздемесі мен жобалық-сметалық құжаттары толық дайындалған. Мемлекеттік сараптама жасалып, қажетті келісімдерге қол қойылған. Зауыттың жобасы мақұлданды. Бүгінде құрылыс жұмыстары бас­талып кетті. Кәсіпорын іске қосылғанда 300 адам жұмыспен қам­тыла­ды. Ал құрылыс жұмыс­та­ры ке­зінде 200 адам жұмысқа тар­ты­­лады. Жоспар бойынша зауыт 2017 жылдың қазан айында іске қо­сылмақ. Ержан БАЙТІЛЕС, «Егемен Қазақстан». ҚЫЗЫЛОРДА.