Премьер-Министрдің орынбасары Б.Сапарбаевтың Оңтүстік Қазақстан облысындағы жұмыс сапары Түркістан қаласында жалғасты. Ол алдымен Түркістандағы балалар ауруханасы мен қалалық балалар емханасында болып, жағдайымен танысты. Ауруханаға тек Түркістан қаласынан ғана емес, көршілес Кентау, Созақ аудан, қалаларынан, Қызылорда облысынан да науқас балалар келіп ем алады екен. «100 мектеп, 100 аурухана» бағдарламасы бойынша ашылған Түркістан қалалық емханасында маусымына 500 адам ем қабылдайды.
Бұдан соң Үкімет басшысының орынбасары Қ.А.Ясауи атындағы халықаралық қазақ-түрік университетінде «Қазақ мемлекеттілігіндегі Қазақ хандығының орны» тақырыбындағы халықаралық ғылыми-теориялық конференцияға қатысты. Конференцияға Түркия, Иран, Корея, Ресей, Өзбекстан, Қырғызстан, Қазақстан және т.б., елдерден 200-ден аса тарихшы, философ, теолог, филолог, шығыстанушы, этнографтар мен деректанушы, тарихнамашы ғалымдар, ғылыми-зерттеу институттары мен ғылыми-зерттеу орталықтарының қызметкерлері шақырылған.
Конференцияға дайындық барысында Қ.А.Ясауи университеті ғалымдарының бастамасымен елімізде алғаш рет «Қазақ хандары» атты энциклопедиялық анықтамалық жинақ дайындалды. Жинаққа 78 қазақ хандары туралы және жас ұрпаққа рухани жігер берер тың мәліметтер жинақталыпты. Шетелдіктерден бөлек еліміздің таңдаулы ғалымдары жиналған келелі кеңесті облыс әкімі Асқар Мырзахметов жүргізіп, алғашқы сөзді Бердібек Сапарбаевқа берді. Мемлекет басшысы өзінің «Нұрлы Жол» Жолдауында «2015 жыл – ұлттық тарихымызды ұлықтау және бүгінгі биіктерімізді бағалау тұрғысынан мерейлі белестер жылы. Қазақ хандығының 550 жылдығын, Қазақстан халқы Ассамблеясы мен Конституциямыздың 20 жылдығын, Ұлы Жеңістің 70 жылдығын атап өтеміз. Осынау тарихи белестер жаңа қазақстандық патриотизмді ұрпақ жадына сіңіруде айрықша рөлге ие» деп атап көрсетті, деді Б.Сапарбаев. Конференцияның Түркістанда өтуінің өзіндік ерекшелігі мен маңыздылығы зор. Түркістан қаласы – «Екі дүние есігі, Ер түріктің бесігі» атанған қарашаңырақ, түбі бір түркі жұртының рухани астанасы, Қазақ хандығының 300 жылдық ордасы, күллі түрік дүниесіне идеолог болған ұлы ақын Қожа Ахмет Ясауи, қазақтың жиырмадан астам хандары, жүзден астам билері мен батырлары мәңгілікке дамылдап жатқан қасиетті жер. Елбасы Ұлытау сұхбатында: «Біздің еліміз, қазақ жұртының арғы түбі ғұндардан басталады. Ғұндардан кейін көк түріктерге жалғасады. Одан кейін Алтын Орда орнығады. Сөйтіп, хандық дәуірге ұласып, кейін біртіндеп Тәуелсіздікке келіп тіреледі. Осындай үлкен тарихымыз бар. Жастарымыз мұны білуі керек. Біз кеше ғана пайда бола қалған халық емеспіз. ...Тарихын білмеген ұлттың болашағы да бұлыңғыр болуы мүмкін», – деген өте салмақты ой, салиқалы сөз айтты. Тарихи белестерді бағындыруда Елбасымыз күн тәртібіне қойған Ұлт жоспары әрқайсымызды ұлы ізденіс пен серпіліске міндеттеп отыр. Президент Жарлығымен құрылған Жаңғырту жөніндегі ұлттық комиссия жұмысын бастап кетті. Институттық бес реформаны жүзеге асыру алдағы 10-15 жыл аясында еліміздің заманауи болмыс-бітімін айқындайтын болады. Ұлттық тарихымызда бұрын-соңды қолға алынбаған ауқымды істер жүзеге асырылады. Нұрсұлтан Әбішұлының «Нұрлы Жолы» жаңа дәуірдегі Қазақ мемлекетінің тәуелсіздіктің ақ таңында ұзақ сапар, жасампаз жорыққа шыққан жарқын жолы. Әрбір азамат осы жорықтың бел ортасында жүрсе біз мықты ел боларымыз хақ. «Нұрлы Жол» – қазақтың арманы Мәңгілік Елге жеткізер жол. Ендеше, Түркістандағы бүгінгі басқосу өткенге қарап, ертеңімізді кемелдендіруге жасалған игі қадам болсын! Сөзін осылай қорытқан вице-премьер конференцияға қатысушылар мен оны ұйымдастыруға ұйытқы болған Оңтүстік Қазақстан облысы әкімдігіне ризашылығын білдірді. Бұдан соң Білім және ғылым министрі А.Сәрінжіпов пен Мәдениет және спорт министрі А.Мұхамедиұлы сөз алып, халықаралық ғылыми-теориялық конференцияның табысты өтуіне сәттілік тіледі. Ал, қонақтардан алғашқы болып сөз алған Оңтүстік Корея Республикасының Қазақстан Республикасындағы елшісінің орынбасары, профессор Сонг Гим Ёнг «Біздің ел қазақтармен осыдан аттай мың жыл бұрын Ұлы Жібек жолы арқылы байланысқан. Айырмашылығы екі елдің көлігі ат, есек болса мен ұшақпен ұшып келіп тұрмын», деп жұртты күлдірді. Қазақтар тарихқа бай, кеңпейіл ел. Репрессия кезінде қазақ елінен пана тапқан ағайындарымыз өз елінде жүргендей өзін еркін сезінеді. Ол үшін Мемлекет басшысы Нұрсұлтан Назарбаевқа алғысымыз шексіз. Осылай өркендей беріңіздер, деді. «Иман нұрлы Түркістан біздің ортақ тарихымыз, біздің түп-тұқиянымыз бір» деп тебіреніп сөйлеген Башқұртстан Мемлекеттік сыйлығының лауреаты, ақын, Ресей мемлекеттік Думасының депутаты Гүльфия Юнусова мен Қазақстанның өсіп-өркендегенін, тарихтағы алатын орны айрықша екендігін ғылыми дәлелдермен дәйектеген Қазан мемлекеттік университетінің профессоры, Мемлекеттік сыйлықтың лауреаты Хатип Миннегулов және Иран Ислам Республикасы Елшілігі Мәдени өкілдігінің директоры Асгар Саберидің сөзін конференцияға қатысушылар жылы қабылдап, қошемет көрсетті. Халықаралық қазақ тілі қоғамының төрағасы, ҰҒА академигі Өмірзақ Айтбайұлы еліміз үшін аса маңызды жиынға келген жұртшылықты құттықтап, қазақ тарихынан тағзым алып марқаятындай аталы ойлар айтты. Үкімет басшысының орынбасары түркітілдес халықтардың кітапханасында болды. Профессор Құлбек Ергөбектің күш салуымен ашылған кітапханаға шетел ғалымдары өз елдерінен әкелген, қазақ тарихын бедерлейтін құнды кітаптарды сыйға тартты. «Балапан» бағдарламасы аясында ашылған «Сабина» балабақшасының жайымен танысқан Б.Сапарбаев Түркістандағы сапарын М.Жұмабаев атындағы мектеп-гимназиясында қорытындылады.
Бақтияр ТАЙЖАН, «Егемен Қазақстан».
Оңтүстік Қазақстан облысы.
Суретті түсірген Қайсар ШЕРІМ.
