Өрімдей өнерлі өрен

Мектеп – баланың өрісін кеңейтіп, өмір кетігін тауып кірпіштей қалануына септігін тигізетін баспалдақ. Ал баланың қарым-қабілеті, өнер-өнегесі мектеп қабырғасында жүрген кезден-ақ байқалады. Талабымен, талантымен талайды тәнті етіп жүрген Индира Қожантайдың өнерге деген сүйіспеншілігі ерекше. Өнер десе ішкен асын жерге қоятын ол болашағынан көп үміт күттіреді. Индира бүгінгі күні Ұлытау ауданына қарасты № 9 Терісаққан орта мектебінің 6-сынып оқушысы. Әнді әуелетіп шырқайтын ән­ші қызымыз мектебіміздің мақ­танышына ай­налған. Аядай білім ұясының жақ­сы атын шығарып, абыройын асқақтатып отыр. Осыдан үш жыл бұрын Индира аудандық «Әнші балапан» байқауының бас жүлдесін жеңіп алып, І дәрежелі дипломмен марапатталды. Былтыр Алматы қаласында өт­кен VІ халықаралық «Ғұмыр дария» ән-би бай­қауында  «Эс­традалық вокал» номинациясы бойынша І дип­ломға ие болды. Жуырда ға­­на Қа­зақ­­­­стан Рес­публикасы кіші Ғы­лым ака­де­мия­сы­ның Қа­рағанды қа­ла­сында бол­ған 45-ші ғылыми-практикалық  конференция­сын­да да озықтар қатарынан табылды. Оқу мен өнерді қатар ұштас­тыра білген Индира әр іске жауап­кершілікпен қарайды. Қазақтың қызына тән жақсы қасиеттер оның бойында көп. Мектебімізде 57 бала білім алуда. Солардың бірі –  Индира. Ол әншілік өнер әжесінен дарығанын мақтанышпен айтады. «Бұл өнер маған әжем Сәбира Ғалы­қызынан дарыған болар. Әжем сызылтып ән шырқағанда көпшілік сүйсініп тындайды екен. Ал есепке бейімділігім  атамнан берілген болар. Атам соғыс ардагері. Ол кісінің көптеген орден, медальдарын көздің қарашығындай сақтап отырмыз. Атаммен мақтанамыз да» дейді Индира. Айғаным Бейсембаева, №9 Терісаққан орта мектебінің бастауыш сынып мұғалімі. Қарағанды облысы.