Қазақстандық жеңіл атлет, Олимпиада чемпионы Ольга Рыпакова 2016 жылы Бразилияның Рио-де-Жанейро қаласында өтетін Олимпиадаға жолдаманы жеңіп алды. Орталық армия спорт клубының капитаны болып табылатын Рыпакова бұл биікті Шанхайда өткен «Бриллиант лигасы» сайысының екінші турында қола медальді жеңіп алу арқылы бағындырды. Оның осынау жарыстағы сәтті жеңісі Рио-де-Жанейро Олимпиадасына жолдама алуына мүмкіндік берді. Осымен Ольга Рыпакова өзінің спорттық мансабында Олимпиялық ойындарға үшінші мәрте қатысқалы отыр. Бұған дейін ол 2008 жылы Пекин Олимпидасында өнер көрсетсе, 2012 жылы Лондон Олимпиадасында алтын медальді жеңіп алды. «Халықаралық жарыстарда биіктен көрініп жүрген талантты спортшы Қазақстанның және еліміздің Қарулы Күштерінің атын шығаруда. Оның жеңістері әскери қызметшілер мен жастардың спортпен айналысуға деген қызығушылығын тудырып, ынталандырады», – деп атап өтілген Қорғаныс министрлігі баспасөз қызметінің хабарламасында.
Руслан ИГІЛІК.
