Салтанатты жиын

Кеше Жоғарғы Сотта Қазақ­­стан Республикасының Конституциясы күніне арнал­ған салтанатты жиын болып өтті. Іс-шараға Жоғарғы Сот Төрағасы Қайрат Мәми, Пар­ламент Мәжілісі Заңнама және сот-құқықтық реформа комитетінің төрағасы Рахмет Мұқашев, Жоғарғы Сот судьялары, Қазақстан Республикасы Судьялар одағының мүшелері, Жоғарғы Сот жанындағы Сот­тардың қызметін қамтамасыз ету департаментінің басшылығы мен қызметкерлері, Жоғарғы Соттың отставкадағы судья­лары мен ардагерлер қатысты. «Осыдан жиырма жыл бұ­рын жеті миллионнан астам қазақстандықтар 1995 жылғы 30 тамыздағы бүкілхалықтық референдумда – қазіргі Конс­титуцияны қабылдау үшін бір­ауыздан дауыс беріп, өзінің тарихи таңдауын жасаған еді. Осылайша, халқымыздың ға­сыр­­лар бойғы асыл арманы жүзеге асып, тәуелсіз еліміздің жаңа Ата Заңы дүниеге келді. Конституциямыз сол уақыттан бері респуб­ликадағы татулығы жарасқан барлық ұлттардың бір шаңырақ астында алаңсыз өмір сүруін қамтамасыз етуде», – деп атап өтті Жоғарғы Сот Төрағасы. Қайрат Мәми бұдан кейін жиынға қатысушыларды Мем­­лекет басшысының бас­тамасымен жүзеге асырылып жатқан «100 нақты қадам – баршаға арнал­ған қазіргі заманғы мемлекет» атты Ұлт жоспары шең­берінде сот жүйесін реформалау жайынан хабардар етті. Осыдан соң салтанатты шара басталды. Оның барысында Жоғарғы Сот судьялары мен департамент қызметкерлеріне Елбасы Жарлығына сәйкес «Қазақстан Конс­титуциясына 20 жыл» мерейтойлық медалі, айрықша белгілер, Құрмет грамоталары мен Алғыс хаттар тапсырылды, деп хабарлады Жоғарғы Соттың баспасөз қызметі.