Ел чемпионаты мәреге жетті

Батыс Қазақстан облысына қарасты Зеленов ауданының Асан ауылында ат спорты түрлері бойынша жастар арасындағы ел чемпионаты мәреге жетті. Облыстық балалар мен жасөспірімдер спорт мектебінің базасында көкпар, аударыспақ, теңге ілу және жамбы атудан жарыс­тар ұйымдастырылды. Көпшіліктің қызығушылығын тудырған көкпардың финалдық бәсекесінде қызылордалықтардан басым түскен оңтүстікқазақстандықтар жеңіс тұғырына көте­рілді. Алаң қожайындарын 5:2 есебімен ұтқан Жамбыл облысының командасы жүлделі үшінші орынға жайғасты. Ал аударыспақтан өз салмақ дәре­желерінде оңтүстікқазақстандық Еламан Пернебек (50 кг), қызылордалық Бердібек Жорабек (60 кг), ақтөбелік Шың­ғысхан Ержанов (70 кг), оңтүстікқазақстандық Есімхан Рахматулла (80 кг), ақтөбелік Саят Сатым (80 кг жоғары) жеңіс тұғырына көтерілді. Теңге ілуден ақтө­белік Әлихан Бәшенбай үздік шықса, жамбы атудан оңтүс­тікқазақстандық Ералхан Айкөз алдына жан салған жоқ. Жарыстың жабылу рәсімінде облыс әкімі Нұрлан Ноғаев сөз алып, көнеден үзілмей келе жатқан ұлттық спорт түрлерін одан әрі дамытудың қажеттігін атап көрсетіп, жарысқа қатысушы барлық командаларға алғысын білдірді. «Егемен-ақпарат».