Конституция – ел халқы мен Елбасының орасан зор еңбегінің жемісі

Ел Конституциясының 20 жылдығына орай Орталық коммуникациялар қызметінің алаңындағы дәстүрлі брифингке келген Қазақстан Республикасы Конституциялық Кеңесінің Төрағасы Игорь Рогов Ата Заңымыз – ел халқы мен Елбасының орасан зор жемісі екендігін атап өтті. – Конституция – сіздер мен біздерге, Тәуелсіз Қазақ­станымызға көптеген мүм­кіндіктер берді. Онда ел азаматтары бостандығының сақталуы мен жеке құқының қорғалуы, емін-еркін жүріп-тұруы жан-жақты қарастырылған. Ал оның басты кепілі – Тұңғыш Президентіміз, Елбасы Нұрсұлтан Назарбаев болып табылады, – деді Конс­титуциялық Кеңес Төрағасы. Ата Заңымыздың жазылу тарихына куә болған, әрі сондай игі істің басы-қасында жүрген Игорь Рогов сөз арасында Мемлекет басшысының бұл іске өте ұқыптылықпен қарағандығын айта келіп, Нұрсұлтан Әбіш­ұлының Заңды жазып шығу үшін оннан астам мемлекеттің Конституциясымен танысып, талқылаудан өткізгендігін еске салды. Сондай-ақ, төл Ата За­ңымыздағы әр бап пен оның тармағына, тіпті, әрбір таңбасы мен әрпіне дейін өзі мұқият қарап шығып, сараптаған. Нәтижесінде, бейбіт елімізде бүгінгідей мамыражай тіршіліктің қамтамасыз етілуіне сеп болып отырған Ата Заңымыз жазылып шыққан. – Орайы келгенде айта кете­йін, бұл туындының шетелдік білікті заңгерлер арасында «Назарбаевтың Конституциясы» аталуының себебі жайдан-жай емес болса керек-ті, – деді ол. Осы Конституциямызда тайға таңба басқандай етіп көрсетілген азаматтарымыздың тең құқылы болуы – еліміз бен жеріміздегі ұлттар мен ұлыстардың тату-тәтті тіршілік құруының бас­ты себепкері. Ата Заң олардың бүгінгідей бейбіт, алаңсыз ғұмыр кешуінің бірден-бір дәнекері болып отырғандығы да ақиқат. «Бұл сөзім де дәлелсіз емес», деген ше­шен Конституцияның ұлттар татулығының визит карточкасына айналғандығын тілге тиек етті. Ата Заңымыздың әлемдік деңгейдегі абырой-беделіне қатысты ой өрбіте келіп, Игорь Иванович ендігі сөзді атаулы күнге орай ұйымдастырылатын іс-шаралар легіне қарай бұрды. – Сондай айтулы шараның бірі – 28 тамыз күні Қазақстанда Ата Заң күні қарсаңында дәстүрлі түрде Халықаралық конференция өтеді деп жоспарлануда. Уақыт өткен сайын Конституциялық құқық мәселелеріне арналған бұл форум біздің еліміздің брендіне айналып келеді. Себебі, шетелдік әріптестерімізбен, заңгерлер мен халықаралық ұйымдар өкіл­дерімен кездесу кезінде немесе сырт мемлекеттерде өткен конференцияларда Астанадағы жиынымыз жайында жиі сөз қозғалады. Атап айтқанда, ше­тел­дік әріптестер жыл сайын өткізілетін біздің конференция  Конституциялық құқық мәселелеріне арналған бірегей алаң екенін алға тартады, – деді ол. Нұрлыбек ДОСЫБАЙ.