Туристік жәрмеңке және қолөнер кәсіпшілігі

Әлемдік тәжірибеде туризмнен түскен табыспен ғана күн көріп отырған елдер бар. Оны былай қойғанда, Дүниежүзілік туристік ұйымның дерегі бойынша, әлемдік жалпы өнімнің оннан бір бөлігін, халықаралық инвестицияның 10 пайызын туризм қамтамасыз етеді екен.Әлемдік өндірістегі әрбір тоғызыншы жұмыс орны да осы саланың үлесіне тиесілі. Сондықтан дамыған елу елдің қатарына енуге талаптанып отырған Қазақстанда туризмді дамытудың маңызы зор. Ал, елімізде, соның ішінде Ақтөбе өңірінде туризмді дамытудың мүм­кін­дігі мол екендігі Ақтөбе қаласындағы “Мега Ақтөбе” демалыс  сауда орталығында  өткізілген “ІTFA- 2010. Туризм. Саяхат. Спорт” атты VІІІ халықаралық туристік жәрмеңке барысында айқын аңғарылды. Бұл – осымен сегізінші рет өткізіліп отырған жәрмеңке. Жыл сайын осындай дәстүрлі туристік жәрмеңкенің Ақтөбеде өткізілуінің де өзіндік мәні бар. Ақтөбе об­лы­сы – Батыс Қазақстандағы ірі өнер­кәсіптік және іскерлік орта­лы­ғы болып табылады. Өңірдің туристік мүмкіндігі мол, жағра­пия­лық орналасуы қолайлы, сон­дай-ақ, мұнда Қазақстанның ерек­ше қорғалатын туризм нысандары тізіміне енгізілген бірегей табиғи ескерткіштер де жеткілікті. Көрмеге облыс аудандарынан және еліміздің он облысынан 120-дан астам туристік фирмалар, мей­рамханалар мен қонақүйлер, көлік және сақтандыру компания­лары, демалыс базалары, туристік және спорттық бұйымдар өткізе­тін кә­сіпорындар, мұражайлар, туристік сала мамандарын даярлайтын жоғары оқу орындары қатысты. – Бұл көрмені ұйымдасты­ру­да­ғы мақсатымыз – ішкі туризмді насихаттау, облыстағы демалуға қо­лайлы орындарды таныстыру. Бұл бағытта өткен жылы облыс бойынша демалыс орындарын зерттеу маркетингі жүргізілді. Об­лыс­тың туристік кластерін дамы­тудың жоспары жасалды. Биыл облыстың бес бағыты бойынша жарнамалық-ақпараттық турлар ұйымдастырсақ па деп отырмыз. Рас, облыста туризмді дамытуда өзекті мәселелер баршылық. Ол туристік салада кадрлардың жетіс­пеу­шілігі, барының өзінің іскерлік, біліктілік деңгейінің төмендігі деуге болады. Туристік инфрақұ­ры­лымға келсек, ол бар, әрине. Осы көрменің өзі осы туристік кластер аясында өткізіліп отыр, – деді Ақтөбе облысының туризм, дене тәрбиесі және спорт басқар­масы бастығының орынбасары Жалғас Балғожин. Оның айтуынша, туризм сала­сын қаржыландыру әлі де өз дең­гейін­де емес. Салаға инвестиция тар­ту үшін венчерлік базар ұйым­дастыру көзделуде екен. Сондай-ақ, өңірде инвестициялық жоба рыногын жүргізу жоспарланған көрінеді. Туристік жәрмеңке аясында қолданбалы өнер шеберлерінің “Шеберлер ауылы” республика­лық фестивалі ұйымдастырылған екен. Біз осы көрмеге өз бұйым­дарын әкелген қолөнер шебер­лерімен әңгімелескен едік. Ақмола облысы Қорғалжын ауданынан келген Валентина Жа­қыпбекованың биязы жүннен бас­қан киізден жасалған бұйымдары көздің жауын алады. Бас және аяқ киімдер, әртүрлі кәдесыйлар да өтімді көрінеді. Көрпе, жастық және ұлттық киімдер тігумен ай­на­лысатын ақтөбелік Мәрия Құл­мұратова әзірге үйден тапсырыс алып, жұмыс істеп келіпті. Енді өз ісін дамытып, тігін ательесін ашу­ды ойластырып жүр екен. Түр­кіс­тан қаласынан келген Қалмырза Тасовтың зергерлік бұйымдары да ұсынақты қолдан шыққанын аң­ғартады. Білезік, сақина, қау­сыр­ма, басқа да күмістен соққан кәде-сыйлар көзі түскенді арбап әке­те­ді. Зергер қандай бұйым соқса да ұлттық нақышқа баса назар аударатынын жеткізді. – Бұл жолы біз жарнамалық сипатқа көңіл бөлдік. Көне Көк­жар­да туристер қызығатындай та­рихи орындар жеткілікті. Аудан орталығындағы Көкжар жәр­мең­ке­сі кезінде салынған сауда қатар­лары, мешіт үйі, басқа да ғимарат­тар бар. Барқын құмындағы орманның өзі неге тұрады. Қазір Ойылға қатынайтын жол да жақсарды. Әрине, тап бүгін мұнда туристер ағылады деуге болмас. Дегенмен, осы жолы Ойыл өңірін  кеңірек таныстыру мақ­са­тында ақпараттық-жарнамалық кі­таптар, буклеттер, бейнетаспалар мен аудиокассеталарды ұсынып отырмыз. Ойылда да туристердің талғамынан шығатын көркем де көрікті жерлер бар екенін алыс-жақындағы ағайынның есіне салып, жарнамалаудың қайтарымы кейінірек болады деп ойлаймыз, – дейді Ойыл аудандық өнер және өлке тарихы мұражайының директоры Балқия Рысбаева. Фестиваль аясында “Ішкі және сыртқы туризмді дамытудың проб­ле­малары мен болашағы”, “Батыс Еуропа – Батыс Қытай” халық­ара­лық көлік дәлізінің Ақтөбе учас­кесінде жол бойындағы сер­вистік қызметті дамыту мәселе­ле­рі”, “Қонақ үй және мейрамхана бизнесі”, “Қолөнер және кәсіп­шілік. Ізденіс, проблемалар және оны шешу жолдары” деген тақы­рыптарда дөңгелек үстелдер өткі­зіл­ді. Оларда туризмді дамыту жан-жақты талқыланды. Экспо­нат­тар арасында “Үздік көрмелік экспозиция”, “Үздік қызмет тұ­сау­кесері”, “Үздік жарнама пакеті”, “Үздік қолөнер шебері” номина­циялары бойынша конкурстар өткізілді. Конкурс жеңімпаздары мен жүлдегерлері облыстық туризм, дене тәрбиесі және спорт басқармасының бағалы сыйлық­тарымен марапатталды. Туристік жәрмеңкеге қаты­сушы­лар ынтымақтастық келісім-шарттарын жасасып, меморан­думдарға қол қойды. Сөйтіп, туризмді дамытуға тағы бір қадам жасалып, туризм индустриясын қалыптастырудың басым бағыт­тары айқындалды. Сатыбалды СӘУІРБАЙ, Ақтөбе облысы.