Солтүстік Қазақстанда көктемгі науқан қызу қарқын алды

ПЕТРОПАВЛ. 21 мамыр. Биыл 3,3 миллион гектар алқапқа дәнді және дәнді-бұршақты, 568 мың гектарға майлы, 448 мың гектарға жемазықтық дақылдар себу жоспарланған.  Бұл туралы облыстық ауыл шаруашылығы басқармасының мамандары хабарлады. Олардың жедел мәліметтері бойынша жаздық дақылдар 300 мың гектарға себілді. Оның ішінде, бидай 180 мың гектарды құрайды. Көктемгі – дала жұмыстарының қарқыны Ақжар, Қызылжар, Шал ақын аудандарында жоғары. 160 мың гектарға майлы дақылдар орнасатырылды. Бұл ретте Қызылжар Айыртау, Есіл аудандары ширақ қимыл танытып келеді. Жемазықтық дақылдарды себу 20 пайызға атқарылды. Барлық алқаптың 40 пайызына картоп, 25 пайызына көкөніс егілді. «Өсімдік шаруашылығын қолдауға бағытталған демеу қаржы мөлшері 14 миллиард теңгеге жетеғабыл. Шаруашылықтар тұқыммен, жанар-жағармаймен толық қамтамасыз етілген. Дала жұмыстарына 15,3 мың трактор, 16,2 мың сеялка, 1100-дей себу кешені, 5,8 мың жүк автомобилі, 50 мыңнан астам топырақ өңдеу техникасы қатысатын болады», дейді мамандар. Өмір Есқали. Дерек: Солтүстік Қазақстан облыстық ауыл шаруашылығы басқармасы. Сурет: kaz.gazeta.kz