Қызылордада 2 күнде 1400-ге жуық құқық бұзушылық анықталды

ҚЫЗЫЛОРДА. 27 тамыз. Қызылорда облысында тамыз айының 24-28 күндері аралығында криминогендік ахуалды сейілту, құқық тәртібі мен жол қозғалысы қауіпсіздігін қамтамасыз ету, көшелер мен басқа да қоғамдық орындарда қылмыстарды ескерту және жолын кесу бағытында облыс көлемінде «Құқық тәртібі» жедел-профилактикалық іс-шарасы өтіп жатыр. Бұл туралы egemen.kz тілшісі хабарлады. Аталған іс-шараның 2 күнінде барлығы 1355 әкімшілік құқық бұзушылық анықталды. Оның ішінде автокөлікті мас күйінде басқарған 22 жүргізуші анықталса, қауіпсіздік белдігін тақпай автокөлік басқарған 310 жүргізушіге, ұялы телефонмен сөйлесіп көлік басқарған 210 жүргізушіге, жылдамдықты шамадан тыс асырған 98 жүргізушіге әкімшілік хаттама толтырылды. Сонымен қатар, есепті мерзімде қалалар мен елді мекендердің аумақтарын көріктендіру ережелерін бұзудың 113 дерегі, қоғамдық орындарда спирттік ішімдік ішу немесе мас күйінде жүрудің 92 дерегі, кәмелетке толмағандардың түнгі уақытта заңды өкілдерінің еріп жүруінсіз үй-жайдан тыс жерде жүруінің 82 дерегі, басқа да ұсақ бұзақылықтардың 87 дерегі анықталған. Жалпы, 2 тәулік ішінде 24 қылмыс ізі суымай ашылды. Іздеуде жүрген 3 қылмыскер ұсталып, бұрын жасалған 13 қылмыс ашылды. Ержан Байтілес. Дерек: egemen.kz. Сурет: total.kz.